《巨輪》演員接連發生交通意外，噚晚阮兆祥駕駛平治跑車沿尖山隧道往長沙灣方向行駛，當駛至管道出口附近時，疑切線失控，撞向前面私家車，打「白鴿轉」後橫亙路中，車頭損毀左前轆爆裂，好彩阮兆祥冇受傷，事後祥仔受訪時都話唔好意思，好彩大家冇事；

今晨9點半，陳展鵬喺上環炒車，而當時有指貌似鍾嘉欣嘅女子喺車上，發生意外後，疑似鍾嘉欣即落車狂奔，現場得返陳展鵬喺度，事後陳展鵬照樣出發去澳門，不過問佢當時車上係咪有鍾嘉欣時，佢只係不停話唔好意思；反而鍾嘉欣事後就話兩人原訂出發到澳門，出席劇集宣傳活動，由於佢哋唔係喺公司出發，所以坐展鵬順風車。

雖然發生交通意外，但阮兆祥﹑鍾嘉欣及陳展鵬今日如常去澳門宣傳《巨輪》，同劇演員張繼聰、田蕊妮、蕭正楠、貝安琪等都有出席，而眾藝員都有參與拜神儀式，拜得神多自有神庇佑，祥仔及展鵬心情似未受影響，展鵬仲同傳緋聞嘅貝安琪合照添。

嘉欣BB就話好彩意外中冇人受傷，仲大讚展鵬照顧自己：佢話：「意外發生之後展鵬叫我上船先，佢留低處理。」而展鵬就話架車花咗少少：「架車買咗全保，同的士司機有共識，返到香港會同佢聯絡。」

至於噚晚亦撞車嘅祥仔話撞車剎那感覺好奇怪，佢話：「打完白鴿轉架車滑行，我心諗千祈唔好劃花塊面。」事後祥仔仲幫對方司機搵拖車，仲送埋自己演唱會飛畀對方。

陳展鵬及阮兆祥都發生交通意外，好彩兩人都冇受傷，不過都係拜拜神穩陣啲﹗

陳展鵬今晨喺上環炒車。

之後佢如常坐船過澳門。

但冇回應記者提問，只係不停按手機。

阮兆祥噚晚都發生交通意外，好彩人冇事。(網民山夆攝)

祥仔及展鵬誠心拜神。

鍾嘉欣

陳展鵬同緋聞女友貝安琪（左）合照。

阮兆祥（右仔）話撞車剎那感覺相當奇怪。

展鵬就話座駕花咗少少，而架車亦買咗全保。

眾《巨輪》藝員今日到澳門媽閣廟，為新劇宣傳。

嘉欣BB好受市民歡迎。

嘉欣BB讚展鵬好識照顧自己。

蕭正楠及田蕊妮friend到爆﹗

拜神拜神拜神﹗