《巨輪》田蕊妮變身14巴港女 怒摑宋熙年

田蕊妮、蕭正楠(Edwin)、陳展鵬、張繼聰、阮兆祥同李司棋,今日喺電視城出席劇集《巨輪》「我至Like」三甲名單記者會。觀眾投票至現時為止,阿田、Edwin同展鵬暫時係票數最高嘅三位。

對於噚晚嗰集阿田大巴大巴掌摑宋熙年,阿田都話噚晚睇電視時,都覺得自己好凶狠,不過佢大讚宋熙年:「佢叫我真係打落去,打一巴就話啫,劇情講我要打好多巴,我真係會打到佢塊面大過我,好彩佢長頭髮,我咪打佢頭髮囉,現場又有武指,點知我推低佢,佢又多口話對手郁得可以還手,我咪夾住佢對手。」呢場戲被指激過14巴港女,阿田講笑咁話:「係呀,我諗係個勢。」

雖然佢老公杜汶澤仲喺日本拍緊《豪情2》,但原來都有留意呢場戲嘅網上反應,阿田話:「佢好賤格留言話『你平時知我點生活啦!』佢唔好返嚟,我真係夾佢對手呀!」

講到阿澤拍《豪情2》風流快活,阿田就話:「過兩日佢返嚟,最初佢幾興奮,0依家應該有啲事,等我check下佢先,睇到好厭。」

喺劇中辜負阿田嘅Edwin,就被唔少網友鬧爆,揚言要火燒「羅威信」和「羅信記」,搞到Edwin要向阿田求救,不過祥仔喺現場大玩爛gag:「燒來燒去咪又係蕭正楠!」Edwin解釋:「好多人都誤會我,以為我鍾意嘉欣,其實當初知道佢係阿哥嘅女朋友,我已經放棄咗,大家唔好誤會呀。」

《巨輪》田蕊妮變身14巴港女 怒摑宋熙年

田蕊妮喺《巨輪》怒摑宋熙年,佢都話自己好凶狠。

田蕊妮笑言老公杜汶澤返港後,會夾老公對手喎﹗

蕭正楠喺劇中辜負阿田,就被唔少網友鬧爆。