忙於國內拍戲嘅周秀娜，今日專程返港為屯門一間手袋店剪綵。曬黑咗好多嘅娜姐明顯又瘦咗，連驕人上圍都好似縮咗水，一身Pink Lady陽光look獲新店老闆送上價值$23,800新款桃紅色Hermès手袋，娜姐即時心花怒放，更主動跟老闆擁抱。問佢係咪上圍縮水？娜姐笑指喺北京拍戲天氣熱，每天都不停出水（汗）！
對於舊愛陳偉成(Avis)拖新歡Yumi幾乎日日晒恩愛，娜姐似乎唔想多講：「我拍戲地方收唔到新聞，返嚟之後朋友同同事話我聽先知。」佢又話冇印象見過Yumi，只強調過咗去就唔使再講。之後再話:「我又冇特登去睇，因為分手咗手，過咗去，我覺得冇必要去睇，冇咩反應，冇感覺。」至於兩人襯唔襯？娜姐話:「唔識答。因為真係冇乜感覺。」
咁娜姐又睇唔睇好呢段戀情？佢就笑笑口話睇好自己嘅事業喎。咁有何寄語俾Yumi？娜姐反問:「寄語？有咩寄語？」仲向身邊人求救點答，原來娜姐唔明咩叫「寄語」。佢再話：「冇睇，唔清楚，過咗去唔講。」有人提娜姐話一定見過，娜姐裝儍摸摸個頭話:「係咪？我忘記了！(國語)」
早前娜姐被問到點睇Avis有新歡時，娜姐就透過經理人回應「曱甴論」，暗寸舊愛不停媾女就好似曱甴生蛋咁，一胎幾百隻，冇咁得閒回應。今日娜姐澄清番嗰番說話係經理人講嘅，佢本身驚小昆蟲，若果要形容，會指對方係手袋:「如果你要我用一個比喻，我寧願係手袋，年年都有新款，好多男仔都會送袋，咁分咗手之後點算？嗰個袋就攞去放咗佢，加錢換個新款。嗰樣嘢冇得留戀，你一定唔會再用，見到又冇乜意思。」勁喎，又可以拉番去今日個活動嚟講。
問到有人接收咗佢嘅舊袋，感覺如何？娜姐笑笑口話：「我尋求自己搵新款，好多朋友成日叫我食飯介紹。」咁是否慶幸同舊愛唔似得媽模Mia咁要同前夫對罵？娜姐話：「我識Mia，做咗幾年同事，希望大家體諒女仔要照顧兩位小朋友，顧及小朋友嘅媽咪，又勤力工作，但對於佢家事我就唔清楚唔講。」
陰公，點解娜姐瘦到咁，腳又瘀晒，令人好肉痛！
冇呃你，真係咪咪都縮埋。
對腳比之前又「了」咗。
瘀痕清晰可見
新店老闆送上價值$23,800新款桃紅色Hermès手袋，娜姐心花怒放即抱抱。
請自行加設計對白
手袋比喻舊愛:「年年都有新款，好多男仔都會送袋，咁分咗手之後點算？嗰個袋就攞去放咗佢，加錢換個新款。」
個舊袋(即Avis)有人接收咗，點睇？「我尋求自己搵新款，好多朋友成日叫我食飯介紹。」