黃貫中勁撐 天與地 至堅夾band結局

近10年難得有套擺脫師奶口味嘅電視劇《天與地》,雖然收視滑鐵盧,不過,播映以嚟勁具話題性,而且贏盡口碑。啱啱到呢個結局週,劇情更加緊湊,鼓佬(林保怡飾)愈嚟愈奸,為上位不擇手段,同其他兄弟反晒面咁滯,不過喺元旦(01/01)播放嘅大結局,最後定案佢哋3兄弟竟然會同阿佘走埋一齊夾band,連黃貫中都有嚟撐場,唔係咁堅呀?

結局拍足2日2夜

雖然有傳最後佢哋會因為恩怨情仇而反晒面,死嘅死、入獄嘅入獄,不過陳豪就大爆終極至堅結局,佢哋會再次走埋一齊,喺啟德機場舊址夾番場終極一band,勁Rock ‘N’ Roll一番。

監製戚其義都唔小心爆響口話:「最後陳豪、林保怡同黃得斌會用家明嘅歌,嚟維繫住大家好單薄好單薄嘅友誼,場戲重有佢哋嘅年輕版一齊拍,等大家諗多啲。」

據知為咗拍結局場戲,幕後都花咗唔少心力。拍攝嗰幾晚正正係當年(09年)全港最低溫嗰幾晚,陳豪、黃德斌同林保怡要捱凍捱足2日2夜,先拍得完呢場最後夾band戲,認真熱血!

其他傳聞結局我哋收到《天》嘅至堅結局玩夾band show發放正能量,不過外間之前亦傳出不同版本,幾位主角都各自有自己下場,想知邊個結局真係堅?就要mark實01/01晚嘅大結局啦!

黃貫中勁撐 天與地 至堅夾band結局

黑仔 孤獨終老陳豪飾演嘅黑仔,做嘢一向都不擇手段,雖然後來放下屠刀,兼向卓桐(邵美琪飾)自首話同佢結婚嘅真正目的係貪佢嘅財產,但就傷盡卓桐嘅心。黑仔離開證券公司,到酒吧夾band為生。不過,黑仔見鼓佬林保怡打算吞咗卓樺(金燕玲飾)死後間公司,所以聯同卓樺嘅雀友對抗鼓佬,雖然成功,但佢同卓桐復合就無望囉!最後重孤獨終老。

林保怡 死路一條由忠變奸嘅鼓佬(林保怡飾)藉住搭上卓樺(金燕玲飾)而吞併證券公司,點知遇上車禍,自己死唔去就愈嚟愈狠,後來重要脅好友Ronnie(黃德斌飾)幫自己間公司造假賬。雖然最後關頭鼓佬覺悟,不過最後佢為救1個爭啲被車撞倒嘅小朋友而碌落樓梯撞穿頭死,死得陰功﹗

黃德斌 如願入獄一直受良心責備嘅Ronnie(黃德斌飾)最終為殺死家明一事自首,不過就被鼓佬要脅,指手頭上有佢老婆雪薇(湯盈盈飾)被利用洗黑錢嘅證據,迫佢造假賬。最終Ronnie都係盲咗,重因為造假賬而入獄。

阿佘 放低一切由佘詩曼飾演嘅Yan發現 Ronnie、黑仔同鼓佬食咗家明,同3人反目嘅同時,亦唔再相信身邊人,連Dr. Dylan被誤會藏毒而被捕,Yan都唔信係誤會。直至Dr. Dylan患上腦退化症入院,Yan去探佢,先被佢嘅金石良言點醒,原諒咗佢哋3個。全劇由Yan主持電台節目,幻想住家明仍然在世作終結。

黃貫中勁撐 天與地 至堅夾band結局

場口大解構

網民捧到《天與地》上神檯,幾乎每個場口都要解讀一番。近期連去邊度取景都有得講,不如搵嚟編審周旭明親自大解構。

「Beyond屋邨」蘇屋邨

第1集年輕嘅家明揸住綿羊仔送年輕嘅Yan返蘇屋邨,眼利嘅網民一眼就睇穿就喺黃家駒同胞弟黃家強曾經住過嘅蘇屋邨,所以認為喺蘇屋邨取景有特別用意。

周旭明:「揀蘇屋邨係想表達舊邨啫!如果嗰時牛頭角冇拆或者會揀牛頭角㗎!冇其他嘅意思,一場誤會!」

「私家」糖水鋪

有幾集成日講Yan同鼓佬去間糖水鋪度食豆腐花,不過就勁低調唔影招牌;但到咗第25集,鼓佬同卓樺去到元朗嘅佳記甜品食糖水,就大大隻字幫人賣廣告。原來之所以咁低調,係因為呢間位於天后清風街嘅糖水鋪「甜姨姨」係陳豪同監製戚其義有份嘅。

據知,阿戚借個場出嚟係為咗方便拍攝,並唔係想做宣傳。

黃貫中勁撐 天與地 至堅夾band結局

組band搵真銀

成日都聽到啲明星拍戲拍到抽離唔到,終於戲假情真拍埋拖,有啲重結埋婚生埋仔添!

不過拍拍下戲,拍到夾埋band都應該係第1次喇!《天與地》以Rock ‘N’ Roll精神貫穿成套劇,為咗鏡頭前面夾得似模似樣,陳豪同黃德斌重特登走去重學音樂,加上由佢哋3個主唱嘅插曲〈年少無知〉勁hit,所以搞到佢哋勁認真夾咗隊Sober Band。

林保怡重話希望公司可以幫佢哋出碟,重話如果可以返內地出碟搵真銀重好。得閒夾下band jam歌當然爽,不過諗住靠佢搵食,就認真要諗諗喇!大家都知呢個世代做音樂係搵唔到錢㗎喇!

「如果命運能選擇」,佢哋真係會想夾band?咦!乜林保怡唔打鼓走咗出嚟彈吉他嘅?無他嘅,型棍吖嘛!


本文鏈接:黃貫中勁撐 天與地 至堅夾band結局