陳靜（DaDa）本月8日忽然單方面宣佈退出娛樂圈，其經理人施念慈已向DaDa發出最後通牒，要求她最遲在昨日回覆，否則會作法律行動追究，不過直至截稿前，被讀者爆料指正身在澳洲墨爾本的DaDa繼續潛水仍未有回應。

除了電影《重口味》宣傳受到DaDa辭演影響，連她有份主演、錢國偉執導的電影《喜愛夜蒲3》演員角色亦需要大洗牌。據知前港姐季軍、擁有35D上圍的許亦妮，戲份將獲大幅增加，傳會執DaDa二攤升呢做女主角，當中會有不少性感鏡頭，但Whitney屬港姐出身又屬無綫合約演員，形象受到保護，但錢導仍願意作出配合。

許亦妮大晒35D上圍。

導演錢國偉昨日接受電話訪問時，他表示暫時仍未有最後決定：「目前仍商討中，過埋今日先知，無綫有自己制度。今次Whitney只係有限度性感。」他又否認許亦妮取代DaDa：「冇得取代，DaDa條線冇咗，許亦妮嘅角色一直都有，唔關事。」之前傳無綫不想許亦妮太性感，錢國偉否認道：「情就有慾就唔多，上一集連詩雅都冇裸露啦！（對手？）陳柏宇！性感程度好似連詩雅咁，唔會太多，o依家同無綫商討，考慮加重佢戲份。」錢國偉指DaDa一直沒有聯絡他。

被指獲加重戲份的許亦妮，昨日接受電話訪問時表示，不擔心被指是執DaDa二攤，她說：「因為成個劇本唔同咗，同之前唔同，所以冇呢樣嘢。」對於有指她在戲中有不少大膽演出，許亦妮說：「睇過劇本知道會有好多發揮機會，其他事交畀公司傾。」而無綫高層樂易玲昨承認Whitney落實演出：「因為冇咗DaDa角色係有變動，許亦妮聽完都接受到嘅咪畀佢試吓，（唔可以有情慾戲？）《夜蒲3》係2B級電影，我哋無綫對旗下藝員係較嚴謹，不過錢導都應承我會作出適當平衡。」