常言道，最聰明的女人，最懂得在適當的時候扮傻，《衝上雲霄II》中江美儀飾演的Heather，正正就是這類人。美儀演繹這個角色可謂手到拿來，因為私下的她與Heather有不少相似的地方，無論處理工作或感情事的手法，都盡顯智慧，絕對是聰明人的典範。

鬧鬧鬧眾

《衝上雲霄II》的焦點落在「Cool魔」身上，而大灑鹽花的劇情，更令劇集長據於討論區榜首位置。其實除「Cool魔」外，美儀與馬國明的一段姊弟戀，同樣甚有Talking Point，所以在《衝II》仍未播映時，美儀已被馬明的粉絲在網上鬧爆。「好搞笑！套劇都未播，班粉絲就不停鬧，仲話要投訴到去無綫唔再畀劇我拍。無所謂啦！有話題性都唔係壞事，反正又唔影響私生活。」

看似豁達，但外間一直以「母子戀」、「婆孫戀」去形容這段關係，美儀坦言最初真的很勞氣。「最初我真係好唔開心，男友都叫我咪理這些留言，但我就係唔會逃避，你愈鬧我就愈睇，最後我又OK喎！得啖笑囉！可能《名媛望族》真係太深入民心，以為三太太搭上自己個仔？大家醒吓啦！」

對於「死因」，美儀直言並非與馬明年紀的差距，「因為那個人係馬國明，係『筍盤』呀！就算唔係配江美儀，換成第二個女藝人，都一樣會被人喪鬧。」早前，馬明接受訪問時曾透露喜歡年紀稍大的女生，直言享受被照顧的感覺，美儀即抵死地謂：「年紀大唔一定係我，可能係曾華倩呢？哈哈！」

繼續陪跑

09年加入無綫的美儀，一劇接一劇，從《女人最痛》的Angela Auntie之後，接着的每套都甚有發揮空間。人氣急升，令她體驗到「大台」的威力。美儀戲言：「嘩！而家飲茶唔使排隊、去Shopping又有Discount……哈哈！講笑咋！其實最大得着係自己能過足戲癮，因為當時亞視已經好少劇開，我又唔想離開屋企北上拍劇，咁啱無綫有人搵我，順理成章過檔囉！」

過檔一年，就憑《女人最痛》成功入圍2010年萬千星輝頒獎典禮「最佳女配角」的最後五強，翌年亦分別憑《九江十二坊》及《潛行狙擊》獲提名「最佳女主角」 和「最佳女配角」，當然更不少得去年重口味的「三奶奶」憑《名媛望族》問鼎「最佳女配角」最後十強。美儀的演技雖備受公認，但每次均與獎項擦肩而過，她直言：「我相信往後的日子都會只係繼續提名，所以都冇乜期望，我唔敢講，但或多或少都與合約有關。」話雖如此，但近年無綫頒獎台上亦有不少爆冷例子，好像黎耀祥、古明華等，令觀眾有不少驚喜，相信觀眾們都會希望美儀亦能成為其中一分子。

雙贏的學問

某程度上美儀與劇中的Heather一樣，性格獨立，不過過於獨立對她來講，亦並非好事，美儀直言：「以前屋企裝傢私，我絕不會假手於人，但男人就係咁，覺得妳乜都識做，唔需要佢去照顧，自自然然就會搵第二個弱者去照顧。」結束這段關係後，令美儀學精了，現與吳君祥拍拖7載，人前人後都畀足面男友，更讓她悟出相處中雙贏的學問。

拍拖多年，美儀與男友就只欠一張婚紙。還以為結婚是理所當然的事，但談到婚期，美儀反問一句：「點解要結婚？」答案的確令人有點驚訝。她續說：「其實我與男友都一齊住，亦共同擁有一間公司，仲有隻狗，我覺得冇需要去作出改變，亦覺得同結了婚一樣。」

相處7年，關係必定不像拍拖初期般如膠似漆，就像劇中Heather與老公一樣。淡如水的生活很容易令雙方變質，從愛情變至親情，由愛人昇華至家人般，美儀坦言：「所以更加唔應該結婚！因為喺唔需要認定對方的時候，就可以避免出現『老奉』的情況，始終一日未結婚，大家仍有選擇權，應該要時刻提醒對對方的態度。」