「王祖藍私生女」照瘋傳

噚日有網民喺微博貼咗張小女孩相,個小妹妹激似王祖藍,尤其係雙眼同個鼻,加埋個可愛表情,直頭倒模一樣,王祖藍本人噚日都喺微博回應過:「一個隱藏已久的秘密…我的私生女…」而女友李亞男亦語帶疑惑咁話:「跟誰?」

「私生女」照片曝光後,惹嚟網民熱話同瘋傳,DJ林盛斌仲搞笑話:「咦,兄弟王祖藍 ,乜佢而家咁大個女嗱,之前見都仲係手抱?!」今晨祖藍自製一張同該小妹妹合成照,索性將自己個樣Key落小妹妹個頭,唔拼由自可,一拼真係似得交關,爆趣啊﹗

祖藍搞笑留言:「真的那麼像嗎?其實…我是不是曾經醉酒做錯事而我不知道?不可能…我不喝酒。」

及後祖藍再貼全身照,並自爆:「我真正的身份是…藍精靈!」

王祖藍私生女
係咪好似樣?(微博圖片)

王祖藍私生女
祖藍話自己係藍精靈喎。(微博圖片)

王祖藍私生女
祖藍反問自己:我是不是曾經醉酒做錯事而我不知道?(微博圖片)

王祖藍私生女
王祖藍個樣原來都幾百搭喎。(微博圖片)

祖藍有興趣聯絡「私生女」:想知佢係乜嘢人!

王祖藍同張繼聰今日到香港迪士尼樂園,出席「怪獸大學迎新日」活動。噚日有張貌似祖藍嘅「私生女」照片,喺網上瘋傳,真係似足九成,祖藍都話好似,佢仲笑言:「我覺得似到離譜,我懷疑第時真係生BB都冇咁似。」

祖藍又話喺微博見到張相後,好有興趣聯絡呢個小妹妹,佢講笑咁話:「想搵佢出嚟,我想知佢係乜嘢人,住喺邊度,佢爸媽係邊個,但我驚唔小心搵到血緣關係,發現咗啲秘密就唔好啦﹗」

另外,阿聰畀祖藍嘲係怪獸家長,所以好適合為呢部電影配合;另外,有報道指阿聰買咗新車,佢就話:「澄清部車唔係我,係我老婆(謝安琪)嘅,但就係我買嘅,因為我嘅錢係佢嘅錢,佢嘅錢都係佢嘅,嚴格上全部錢都畀晒佢。」