王祖藍小學開始扮女人

王祖藍扮女人扮到出神入化,最近他在《荃加福祿壽》節目化身「Handelababy」夾出乳溝,令人讚嘆不已。在他口中自嘲的一雙「童子軍」腿,萬料不到穿上女裝後卻性感撩人,真女人也不敢站在他身旁,祖藍笑說:「我天生冇腳毛,就算爸爸、細佬及妹妹都係冇腳毛,妹妹鬧我扮女人靚過佢,令佢顏面無全。」或許真是三歲定八十,祖藍自爆始於小五便首嘗扮女人滋味,他坦言以引人注意為目標,扮嘢是最直接最快收到效用。

王祖藍

祖藍扮Handelababy夾出乳溝,全拜網絡一段短片教路。他說:「個男人載Nude Bra(隱形胸圍)谷胸,我同服裝組咪跟住做囉,我第一眼見到個效果都笑到癲,咁都得?我唔會再信啲女人係有(胸)o架喇!」之前口硬不認有女友的他,因為扮女人維肖維妙被質疑性取向後,即公開女友身份,他解釋一切只為向女友派定心丸。他說:「女友係保守基督徒家庭,之前佢哋會奇怪我點解周圍講邊個女藝員好咀,感覺我好似口花花咁,既然對方家長唔想我咁,我就話畀人聽『I am not available』!」

祖藍名草有主, 各位少女失望之餘,大可借用他的名句:「我接受唔到囉」,祖藍笑說:「估唔到呢句說話咁受歡迎,我只係隨口講出嚟,好幸運、感恩,我幾歲就睇盧海鵬、賈思樂嘅『蝦仔爹D』,10歲左右又有廖偉雄嘅『乜太』,好耐冇呢啲創造角色咁受歡迎,o依家啲10歲小朋友睇完,將來會覺得我陪住佢哋成長。」

作歌追女仔

祖藍之前不認有女友,他將責任卸給好友蔡少芬(Ada)。祖藍笑說:「學Ada話齋,有同冇都要話冇,如果唔係佢點呃你哋4年?之前唔公開係我哋想要空間,o依家感情未算好穩定,將來可能會遇到好多問題。最初牧師都叫我哋低調啲,所以教會都唔係好多人知,主要得傳道人夫婦知道,Ada就由我醞釀呢段感情開始,全程都知道晒。」

祖藍自爆當時作《矮仔多情》主題曲《跌落凡間的天使》,其實是作來追求女友。他笑說:「最鍾意用公司資源做自己嘢,我成日冇得同佢出街,於是有日同佢講:『我公開講乜你自己聽啦』,首歌表面上我係講緊Angelababy(片中女主角),其實係寫緊佢。」

女朋友最索

公開戀情後,祖藍的女友不想再曝光,二人為避狗仔隊追訪,相隔個多星期沒有見面。他說:「呢個係等價交換,公開戀情就冇咗空間一齊,我感謝上帝,之前畀記者跟咗一個星期,Ada知道我呢排壓力大,有日佢叫我出去祈禱,呢日亦係我唯一一日冇被跟蹤,我同Ada、毛姐(毛舜筠)一齊打麻雀,女友都喺度,但當我將打牌啲相放上微博後,第二日又被記者跟番。班朋友知我大壓力,會關心我哋,一路守護住我哋。」

祖藍最近桃花運旺盛,連帶女Fans人數亦急升,他說:「女仔見到我會話我索過佢哋。(做你女友咪壓力好大?)佢唔會大壓力,喺我心目中佢永遠索過我,有時同佢講電話,佢都會忍唔住笑,叫我唔好用女人腔講嘢,跟住又會笑餐死,最近佢最鍾意我扮Lisa S.。」

鄭秀文力撐

祖藍不介意扮女人受抨擊,最介意還是扮鄭秀文(Sammi)後被指侮辱宗教。他說:「扮女人冇乜所謂,細個睇廖偉雄都係咁,但我身為基督徒,扮Sammi被指侮辱宗教就好唔開心,好彩之後Sammi有傳短迅畀我,話佢都有睇,仲話好好笑,讚我歌詞寫得好有深度,睇得出係用心去搞。」祖藍隨即哼出《信者得愛》旋律,把譜上的新詞唱出說:「『抑鬱症亦好喇』係真嘛!呢件事我唔開心到好多晚都瞓唔着,合埋眼就諗有乜解決方法呢?」

祖藍談及人生首次扮女人,他笑說:「學校舉行聖誕派對,同學仔諗住講耶穌基督誕生故事,我就拎咗阿媽條睡裙、頭巾、唇膏扮聖母瑪利亞大肚。」祖藍模仿當時演繹聖母作動表情說:「我一路嗌唉吔唉吔,啲同學仔就笑到死。(點解咁細個會扮女人?)搶鏡囉,啲師奶會笑,絕對係因為我身高問題,我永遠要做第一,只要扮嘢嗰一刻,我先可以做第一,可能係好勝心強。」

後記:喪食減壓

祖藍以喪食來減壓,賠上的是體重不斷上升。訪問當天,祖藍站在鏡前整理衣服,腰間的車胎圓圓的凸了出來,發福了的他頓時添多幾分「男人味」。他說:「真係好大壓力,對自己要求好高,有時拍好咗成段片想唔要,寧願再拍過,我已同經理人講,外面嘅工作每個月只接一單,我想專注做《荃加福祿壽》,留一半時間返教會,之後要做紅館3場騷、6月又要搞佈道會、7月有自己棟篤笑、仲有舞台劇呢……」看他的工作密密如麻,證明他有人氣受歡迎。

王祖藍