人說近水樓台先得月，但不套用在洪永城身上。他與黃翠如近年被塑造成螢幕情侶，又在新劇《愛我請留言》中合作，恨得一眾宅男牙癢癢。偏偏洪永城對伊人冇feel，兼諸多挑剔，令翠如BB信心盡失。不過睇錢份上，兩人都不介意以情侶檔開工。

撰文：王崇穎

黃翠如及洪永城這對歡喜冤家相識八年，這些年來去過不少國家拍攝旅遊特輯，亦鬧出不少笑話。近年兩人不約而同簽約無綫即獲力捧，早前二人再度拍攝無綫旅遊節目《走過浮華大地》，幕前的互動及調情，觀眾似乎十分受落（宅男除外）。二人雖然私下是好友，且到無話不談的階段，只可惜火花只限在工作層面，感情上從不過電。

■相識八年的洪永城與黃翠如，現實生活中完全唔過電。攝影：陳俊強

■自覺演戲生涯遲起步的翠如ＢＢ，加緊步伐做好每個角色。

翠如ＢＢ聲稱兩人只能兄弟相稱，她說：「好多人都會成日問，但佢真係只係我好close嘅朋友，大家依家咁嘅關係最舒服，大家唔介意知道大家有乜嘢衰嘢，亦都唔會介意去講。平時大家喺電視上見到佢好大細路，但私下佢好大佬，成日都會話我知人生嘅嘢，同會討論我嘅問題。」翠如ＢＢ是宅男眼中的蘋果，偏偏洪永城對她諸多挑剔，甚至人身攻擊，令她信心大跌，她說：「佢個人好開放，鍾意四圍識朋友，反而我私下比較自閉。佢仲成日話我，例如話我着衫好核突，笑我老套冇品味，又話我成日亂將所有嘢都放上身。」

■在早前播出的《走過浮華大地》中生鬼有趣的最佳拍檔，卻原來曾吵大鑊。

情侶??着數

洪永城坦言八年相處從未試過有動情一刻，反而更擔心「冇女埋身」，他說：「個個都話佢好，但冇感覺就係冇感覺。我本身鍾意啲比較有肉地嘅女仔，細個仲鍾意鬼妹，所以如果一個女仔知道我同佢係幕前情侶都會擔心。工作上大家合作得好好，嗰種火花令到觀眾好開心。」兩人亦表示絕不介意以情侶姿態出席活動，事關酬勞必定比單飛好。

■由主持轉型拍劇，洪永城坦言仍未習慣。

無聊撩交嗌

別以為兩人老友鬼鬼無所不談，早前他們拍《走過浮華大地》時一度發生爭執，嚇壞旁人。翠如ＢＢ說：「今次拍《浮華》嘈過兩次，因為大家做嘢嘅睇法唔同，其中一次真係好無聊，我喺鏡頭前拍佢，佢覺得俾女仔拍令佢好唔型，就好大力拍番我，之後我就唔睬佢成日。啲工作人員問我哋到底嘈完未先冇事，我哋兩個相處就好似小朋友咁，大家都唔會相讓，但又會好快冇事。」問翠如ＢＢ假如有日洪永城突然向她表白，會否嚇壞她？翠如ＢＢ沒正面回答，反而大爆他的生活惡習：「佢個人好鬼污糟，全部工作人員都知，試過唔沖涼瞓覺，所有人都見證過，呢啲嘢都真係冇得避。」翠如ＢＢ又大爆他喜愛四圍識朋友，更經常慘食檸檬。

兩人之前為《走過浮華大地》走過亞洲四個地區，分別韓國、日本、上海及新加坡，原來走遍半個地球的洪永城之前未到過韓國，他說：「首爾我真係未去過，今次去完都鍾意呢個國家，你喺街度見到啲人跟住明星着衫，所有有關娛樂圈嘅嘢都好勁，同我想像中好唔同。」洪永城續說：「識韓妹真係識唔到，佢哋大部份都唔識講英文，通常做完晒工作，當地朋友帶我出去飲吓嘢，好多都好靚女，但真係溝通唔到。」

拍劇摸索期

■翠如ＢＢ轉投無綫即獲力捧，頭炮參拍劇集《心路GPS》。劇照

■仍未慣拍劇的洪永城，獲安排與林夏薇（左）及陳茵媺合作。資料圖片

洪永城和翠如BB近期均受無綫力捧，更一劇接一劇，翠如坦言這一刻依然感覺像發夢：「做戲一直都係我好想試嘅嘢，依家嘅感覺就好似當年拍旅遊節目咁需要摸索期，希望好快可以有一種自在嘅感覺。」對於獲無綫力捧，她說：「真係畀咗好多機會我，多到自己都唔好意思，總之有工作做就要盡全力。入行都十年，做演員都算遲出發，所以都要快少少學好做個好演員。」

洪永城坦言由主持轉型到拍劇依然有點不習慣：「都拍咗兩套劇，但依然唔太慣，以前做旅遊節目拍嗰時都會好隨性，可以做番自己性格，但做演員就需要去演繹一個角色，放感情去投入，而且會影響到情緒方面，因為你要演唔同嘅戲份，可能早上拍你死老母，之後轉頭又拍你好開心開party。呢種情緒會令人好波動。不過拍劇令我學到好多唔同嘅嘢，大家都好幫我，咁自己都要努力啲，希望可以做番少少成績畀大家睇。」