王祖藍李亞男身高差6吋 「高攀」全靠勇

5’4″王祖藍冧掂5’9″李亞男暗撻年幾

近期多位藝人自爆戀情,5呎4吋高的王祖藍昨日亦於微博公告天下,自爆(界)掂5呎9吋的李亞男。原來這對長短配早於年多前已譜出「藍男高矮戀」,正所謂「情人眼裏高一啲」,李亞男揚言絕不介意男友矮她半個頭!

王祖藍早於三年前已跟李亞男傳緋聞,當時二人矢口否認戀情,但原來一段「藍男高矮戀」正不知不覺培育起來。今年中,身為基督徒的祖藍自爆蜜運,並表示女友是一名圈外教友,言猶在耳,但原來是煙幕,他真正(界)掂的其實是「華姐高妹」李亞男!

5呎4吋高的祖藍與5呎9吋的李亞男組成長短配,拍拖年多一直收得極之秘密,為了不想女友變成空氣情人,祖藍昨日於微博公告戀情:「感謝神,在上帝允許的時間,我們的戀情曝光了,希望你們也祝福我和她—不是李亞爸、不是李亞媽,是李亞男!哈哈!(以上資訊由阮兆祥提供)」正式讓戀情曝光之餘,更借祥仔的說話來幽默一番,貫徹其搞笑作風。

高度差距冇障礙

其後,一對小情侶先後現身電視城接受訪問,適逢祖藍正拍攝台慶節目又是扮女人,故上了女妝的他,與穿上平底鞋的李亞男相映成趣。兩口子全程心靈互通,不時篤手指或擊掌為盟,顯然公開戀情後皆心情輕鬆不少,默契十足,羨煞旁人。而祖藍先接受記者訪問。

王祖藍:王 李亞男:李 記者:記

記:拍咗幾耐拖?

王:識咗都有4、5年,拍就拍咗年幾!

記:之前你唔係話女友係圈外人?

王:咪就係佢囉!如果唔話係圈外人,點可以拍年幾拖先!

記:三年前傳過你哋緋聞,今次係唔係復合?

王:唔係好算,嗰時只係有意思,未正式開始,我哋有問過牧師同輔導班畀意見先喺埋一齊。

記:你主動追佢?好大膽喎?

王:梗係啦!佢真係人品好好,佢鍾意我,亦唔介意我矮,話唔係睇我外表。其實佢都好勇,公司已經知我哋關係,叫我哋穩定先公開,依家正在成長中,希望再培養好啲,不過我哋未正式見家長,但有見過佢父母,如果有機會去加拿大登台,會再會吓世伯、伯母。

避談婚前性行為

記:你哋點拍拖?

王:好多弟兄姊妹掩護,朋友亦帶我哋去好地方匿埋!

記:亞男係結婚對象?

王:我哋對感情好認真,公開真係輕鬆咗,之前真係好辛苦。

記:覺唔覺自己講大話?

王:一半半啦!一半係事實,另一半就唔係事實嘅全部,好似蔡少芬當年同張晉拍拖,佢點都話冇,佢咁嘅做法係顧及兩個人嘅空間,我要派定心丸畀佢同佢屋企人。

記:佢有乜吸引到你?

王:佢係虔誠教徒,仲虔誠過我!

記:基督徒咪乜都唔做得?

王:(笑笑口)好多嘢都做得,喺神面前我哋好自由!

記:包括婚前性行為?

王:你哋諗多咗喇!

記:出街係唔係有奇異目光?

王:我哋唔怕其他目光,好注重心靈溝通。

嚴禁女友行性感

訪問完畢,祖藍便入化妝間轉妝,此時輪到李亞男受訪,但為幫女友壯膽,祖藍立即返出來一起接受訪問,合照時李亞男更主動搭男友膊頭又翹手,甜笑不斷,祖藍也不禁笑說:「你比我想像中大膽!」

記:公開咗喎?

李:好開心!心情輕鬆晒,初頭真係好有壓力,依家可以行街、睇戲、食飯。

記:鍾意祖藍乜嘢?

李:好有責任感,好愛我,對我同我家人都好好,好Sweet,畀好多驚喜我!

記:拍拖最難忘係乜事?

李:有一次佢帶我去賣豬仔,其實係去海邊睇星星!

記:佢當你係豬?

王:(此時即插嘴)同豬冇關!

李:嗰次係表白,彼此講出心意,開始互有好感!

王:(又忍不住插嘴,肉麻地說)簡單嚟講即係我鍾意你!

記:唔介意佢矮?

李:佢好多優點,缺點亦努力改善,不過我唔會考慮高度!

記:佢係咪結婚對象?

李:(學祖藍語氣)你哋諗多咗喇!(說罷兩口子隨即擊掌)

記:佢係大男人?

李:佢係一個好男人!

記:成日氹你?

李:我氹佢多啲,因為佢成日氹大家,所以我做佢叉電機!

記:情侶檔工作?

王:(代答)最好唔好,拍拖已經少時間,唔想攞拍拖時間做嘢,不如留番做王牌好過!

記:畀唔畀女友拍咀戲、出席活動着得Sexy啲?

王:睇劇情需要,出活動冇劇情,即係唔需要啦!

母親讚未來新抱

此外,祖藍接受本報電話訪問時,補充表示,自己其實是追了李亞男三年,之前的緋聞其實是暗湧期。他透露女友已見過其母親,又爆母親大讚未來新抱乖、人品好,對女友甚滿意。再談到高度問題時,祖藍說:「佢都唔介意喇!我梗係唔介意啦!」而他接受電台訪問時強調,戀情最初只告知牧師及幾對有同樣經歷的教友,連好拍檔曾志偉、阮兆祥及李思捷亦蒙在鼓裏。

李亞男

身高:5呎9

出生日期:84年11月25日

獎項:04年溫哥華華裔小姐冠軍、05年國際華裔小姐冠軍

緋聞:王浩信、王祖藍

王祖藍

身高:5呎4

出生日期:80年1月9日

獎項:08年TVB飛躍進步男藝員

緋聞:蔡少芬、李亞男、「馬國朱茵」顏薇恩

王祖藍、李亞男

王祖藍為保護戀情而「半講大話」,李亞男則揚言不介意男友高度。

王祖藍、李亞男

戀情公告天下,李亞男與王祖藍均笑不攏嘴。

王祖藍、李亞男

兩口子甜蜜受訪,又玩篤手指。

今年初祖藍的甜品店開張前,李亞男陪監工,還找來好友苟芸慧作「掩護」。資料圖片

今年初祖藍的甜品店開張前,李亞男陪監工,還找來好友苟芸慧作「掩護」。資料圖片

高度成為焦點,李亞男配合男友祖藍的搞笑作風,表示已着平底鞋而來

中文不太好的李亞男無端端講豬,祖藍即從旁糾正。

高度成為焦點,李亞男配合男友祖藍的搞笑作風,表示已着平底鞋而來

藍男喜獲同事送抱祝賀。

高度成為焦點,李亞男配合男友祖藍的搞笑作風,表示已着平底鞋而來

高度成為焦點,李亞男配合男友祖藍的搞笑作風,表示已着平底鞋而來。

李亞男身材惹火,但王祖藍講到明不想女友行性感!資料圖片

李亞男身材惹火,但王祖藍講到明不想女友行性感!資料圖片

李亞男身材惹火,但王祖藍講到明不想女友行性感!資料圖片

呃晒「福祿壽」祥仔大報復逼婚

祖藍的「福祿壽」拍檔阮兆祥與李思捷昨日得知「藍男戀」時一臉愕然,原來兩人事前一無所知,祥仔說:「個個都以為我同李思捷一早知,其實我真係唔知!佢係講過有個教友女友,話拍緊拖好Sweet,但就冇講係邊個!我都話祖藍好深謀遠慮,唔好以為佢主持過兒童節目就好簡單。諗番起前幾日佢喺度話『穿喇穿喇』,原來係講呢樣嘢!喺節目巡禮見到李亞男坐喺佢隔籬化妝先估到,所以話男人要嘅係風度唔係高度,風度係能夠吸引到女仔。」他笑言要在《荃加福祿壽》演唱會中大報復,逼他向女友求婚。李思捷則表示祖藍已大個仔:「最緊要佢鍾意。」

苟芸慧讚祖藍嫁得過

至於與王祖藍及李亞男分屬好友的苟芸慧大表恭賀:「之前都有一齊返藝人之家,但係都唔察覺佢哋一齊!佢哋有分享拍拖嘅事,但係就冇講同邊個拍拖嘅。(高度相差好遠?)佢哋兩個識咗好耐,可能好多嘢已經衝破咗外表框框!祖藍好Nice,係個可以付託終身嘅人。」單身的她也恨拍拖,笑言不介意另一半矮過自己,另一好友馬賽則說:「佢哋都唔係以貌取人嘅人,亞男係好善良嘅女仔,佢哋心靈上溝通到就得。」她還在微博留言:「祖藍哥哥,大家終於可以公開地獻上無盡的祝福了!」顯然她一早知情。祖藍舊拍檔阮小儀亦在微博祝賀:「祝你倆恩恩愛愛Sweet到痹!」

突爆戀情夠搶「嚇」

不少圈中人愛將戀情低調處理,但當決定不避嫌公開時,分分鐘「米已成炊」,令人大嚇一跳!

第1位:林嘉欣、袁劍偉
今年六月,林嘉欣下嫁秘密拍拖兩年的廣告導演袁劍偉,當時更已懷孕兼在加拿大待產!上個月順利誕下女兒,並取名為Kayla。

驚喜指數:★★★★★

第2位:徐熙媛、汪小菲
現年34歲的徐熙媛(大S)與年輕五載、擁逾25億身家的汪小菲於上個月突然閃電訂婚,她自爆第四次見面、相識僅二十日便訂婚!消息震驚中港台。

驚喜指數:★★★★

第3位:蔡卓妍、陳偉霆
28歲的蔡卓妍與25歲的陳偉霆上月向本報自爆拍拖三個月,據知同公司的他倆因頻頻合作而撻着!事件爆出後,他多次向女友公開示愛。

驚喜指數:★★★

瞞戀情教友力撐 韓馬利:保護對方啫!

當年祖藍曾揚言女友是圈外人,但實情是華姐冠軍李亞男!身為基督徒的他講大話瞞戀情,圈中教友各有意見。早知「藍男戀」的韓馬利力撐祖藍:「佢都係想保護對方啫!又唔係話冇女朋友。(講大話喎?)咁都要睇佢出發點同動機,至少佢係認有女友,不至於大罪啦!」至於孫耀威指可能事出有因:「係咪當時李亞男諗住退出娛樂圈呀?所以祖藍先話女友係圈外人,相信佢哋唔係有心講大話,保護感情啫!」周永恒則指不應講大話:「希望耶穌原諒佢,講咗大話要懺悔、祈禱、認罪,公開拍拖係好事,大家係成年人,若然呢件事令人質疑佢幾唔抵。」

戀愛無分長短

有云「情人眼裏出西施」,不少身形不算高大的知名男士亦能獲高妹垂青,有些最後更拉埋天窗。

甄子丹汪詩詩差2吋
身高5呎7吋的甄子丹與身高約5呎9吋的汪詩詩於03年相識,僅三個月便低調結婚,更育有一對子女。

Jean 楊紫瓊差1吋
身高約5呎7吋的楊紫瓊與只有約5呎6吋的法籍男友Jean Todt自04年拍拖至今感情穩定,更打算結婚。

郭富城熊黛林差3吋
07年初,身高5呎7吋的郭富城與5呎10吋高的熊黛林傳緋聞,雖至今未有承認戀情,但已是公開的秘密。

三年地下情の路

「藍男戀」愛苗早於三年前萌芽,由於兩人同屬基督徒,自然甚有默契,多年來不難找到二人發展的蛛絲馬迹!

07年11月:王祖藍被拍下與李亞男撐枱腳,後即傳出緋聞,11月二人為台慶完騷後與其他藝員一起食消夜慶功,李亞男刻意走後門避記者,更令外界覺得二人「有啲嘢」。

09年6月:祖藍08年被指力追有「馬國朱茵」之稱的顏薇恩,淡化「藍男戀」緋聞,實情祖藍鍾情李亞男,他擔正主演電影《矮仔多情》首映禮,李亞男毫不避嫌專程捧場。

10年1月:祖藍與友人合資特色甜品店,新舖裝修時李亞男和好友苟芸慧到場幫手,阿男不介意拿起掃把掃地,又搞笑地用木梯為祖藍量度高度,大晒恩愛。

10年3月:祖藍有份主持的《荃加福祿壽》今年3月熱播,祖藍反串扮女人,聯同李亞男和陳爽等扮韓國女子組合Wonder Girls獻唱《Nobody》,二人「拍住拖」開工。

王祖藍李亞男

07年底

王祖藍李亞男

王祖藍李亞男

09年初

王祖藍李亞男

今年3月

王祖藍李亞男

藍男年前為本報拍攝運動專題,默契十足。(設計對白)追咗咁耐,終於追到你喇!

第一頁:王祖藍李亞男公開戀情 身高差6吋 「高攀」全靠勇
第二頁:祖藍、李亞男公開晒恩愛 中外長短腳之戀
第三頁:王祖藍專訪 講述戀愛經過
第四頁:5’4″王祖藍冧掂5’9″李亞男暗撻年幾