史上最強《最佳女主角》章子怡趙薇撐黎芷珊

黎芷珊舊年自薦主持無綫清談節目《最佳男主角》,碌晒人情卡請得梁朝偉、劉德華、黃秋生、謝霆鋒、劉青雲、古天樂、吳鎮宇同梁家輝等超強卡士相助,令節目叫好叫座,仲攞埋台慶「最佳節目主持」獎,努力得到回報。

嘟姐仲考慮緊

芷珊之後努力炮製《最佳女主角》,聽聞前排已經拍咗好多集,今次出手相助嘅女主角勁猛料,分分鐘係史上最強,包括鄭秀文(Sammi)、劉嘉玲、楊千嬅、袁詠儀同毛舜筠等,唔止香港嘅女主角陣容強勁,連內地嘅猛料女主角都畀面芷珊,嚟緊芷珊就會飛去北京訪問章子怡同趙薇,另外周迅都答應咗㗎,睇嚟今次芷珊又碌爆人情卡喇!

其實講到最佳女主角,喺香港地位有番咁上下嘅鄭裕玲(嘟姐)又點會少得呢?不過聽聞嘟姐仲考慮緊,因為佢唔多想提佢同呂方嘅舊情。噚日問到監製何小慧,佢就話未同嘟姐講內容,只係度緊期啫。至於其他嘉賓嘅名單,小慧都唔肯透露,因為佢哋仲搵緊好多女主角,如果搵齊咁多個女主角,預計可以做到三十集。節目就定咗喺9月尾、10月出街,淨係睇呢啲陣容,已經好期待啦!

黎芷珊炮製《最佳女主角》,獲鄭秀文、楊千嬅、趙薇同章子怡等人拱照,令人期待。設計圖片及對白
■黎芷珊炮製《最佳女主角》,獲鄭秀文、楊千嬅、趙薇同章子怡等人拱照,令人期待。設計圖片及對白