吳千語想35歲結婚 Chok峯等到50歲

「峯語」拍拖近一年,林峯和吳千語愛得癡纏又高調,早前更被影到Chok峯摸千語BB個肚,誤以為計陳豪陳茵媺後,娛圈又有喜事。不過二人例牌否認。日前,峯嫂無工開,同朋友行街食Tea,預演少奶生活,問到幾時拉埋天窗,已成功征服Chok峯的她說:「35歲先啦!」擺明唔憂嫁!

33歲林峯與19歲吳千語拍拖近一年。兩人愈愛愈高調,繼機場首次拖手晒恩愛後,又成日甜蜜出巡,行頭日日唔同款兼闊太咁嘅千語BB,似乎好快入豪門。上月,二人與友人飯敍都不避嫌摸面又摸肚,加上有網友爆料話二人親友收到喜帖,結婚一事似層層。對於好事近,Chok峯例牌否認說:「適當時候做適當嘅嘢,呢個時候適合工作。(結婚會公開?)無需要。」暗示會秘婚。

「想有個童話婚禮」

日前下午四時,千語BB同女友人閒逛中環置地廣場,見她走入名鞋店Roger Vivier。試了一會,Sales指外面有記者,她就望鏡笑一笑,繼續試鞋。半小時後都係無心水就走人。離開店舖時,她不時左右張望,之後行去附近High Tea。記者問她是否好事近?她否認:「未諗呢啲嘢!(想學陳茵媺有個童話婚禮?)都想㗎!(咁幾時同峯峯結婚?)哈哈!35歲先啦!」咁遲?!Chok峯咪成50歲?!

吳千語:35歲先諗結婚 征服Chok峯一年唔憂嫁