有「化妝間梁朝偉」之稱的無綫資深化妝師張家萬（Gary）前晚心臟病發猝死，年僅39歲。Gary 1994年在無綫兼職化妝，翌年正式加入無綫，生前職位是藝員形象科助理督導，日常主要擔任劇集、節目及大型節目如台慶、「獎門人」系列、「香港小姐」、「華姐」、「東華」等化妝師。他為無綫服務20年，曾合作過的藝員無數，包括佘詩曼、楊怡、鍾嘉欣等，並因性格活潑主動而人緣極佳；而他戴黑超、穿黑長襪的形象亦令人留下深刻印象。

■黃心穎喺微博對Gary嘅離去覺得難以置信。
微博圖片

無綫企業傳訊部宣傳科副總監曾醒明昨日在電視城證實：「Gary喺TVB服務咗就嚟有20年，佢係藝員形象科助理督導，我哋對佢嘅離世深感痛惜，事前亦都冇任何先兆，希望佢嘅家人節哀，我哋會為Gary嘅身後事提供協助。」

胡杏兒噚日喺電視城話前晚知道Gary過身嘅事，希望佢一路好走，杏兒仲話：「佢嘅為人樂觀開心，識打扮又有型，而且鬼鬼哋咁，最難忘係當年拍《我的野蠻奶奶》時要化一個好特別嘅妝，但係佢化完後覺得唔滿意，同我講唔好意思。」金剛話初初知道呢個消息，以為係講笑：「係阮兆祥打畀Gary家姐求證先知道係真，好愕然同難以置信。」金剛話幾個《獎門人》主持人都係佢負責化妝，最後一次見面係喺一個月前大家去咗外地做嘢。

有好多佢生前合作過嘅藝員朋友，紛紛喺微博哀悼呢位好友，蔡少芬話心痛難過，願佢嘅家人堅強！事前仲同Gary有講有笑嘅黃心穎，亦都話同佢有太多有趣嘅回憶，希望佢喺天國繼續活得自由開心！三哥苗僑偉、蒙嘉慧、同鍾嘉欣亦都有留言，回憶與Gary相處往事。