與第四任首富女老婆離婚 63歲夏韶聲 :我大把女友,最緊要開心!

現年62歲的夏韶聲驚爆於半年前第四度離婚,嫌越南前首富千金Tina太黐身,斬斷9年婚姻,由於兩人婚前簽有協議,他沒有瓜分前妻的逾億身家,隻身由4萬呎美國羅省豪宅搬竇返港蝸居幾百呎村屋,打回原形做回普通人。昨日夏韶聲坦言前妻離婚後火速再嫁,62歲老而彌堅的他不甘示弱,自豪地說:「我大把女友,最緊要阿叔開心!」

憑《空櫈》及《結他低泣時》等金曲唱紅的「香港搖滾之父」夏韶聲,現年62歲的他經歷四段婚姻風流過人,第四任老婆是越南華僑前首富千金Tina,05年已屆53之齡的夏韶聲,在美國羅省認識從事時裝生意、當時38歲的富家千金Tina,兩人相識僅4日即閃婚,Tina不但有米兼樣靚身材正,婚後更豪擲200萬美元(約港幣1,600萬)在羅省買入4萬呎獨立屋作愛巢,怎知兩人婚姻只維持9年,於去年7月正式離婚。

嫌有錢老婆黐身 第四度離婚 夏韶聲:我大把女友,最緊要阿叔開心!
【第四任老婆】
【嫌太黐身】現年62歲的夏韶聲驚爆撇年輕15歲的有米老婆Tina,離婚原因竟是嫌前妻太愛他太黐身。資料圖片

昨日夏韶聲接受本報電話訪問爆離婚原因,自言不愛食軟飯做金絲雀的他說:「唔啱咪離,離婚好普通事,大家心都安樂落,我咁大個仔未試過咁鬆動,我諗佢愛得我太犀利,24小時打電話畀我,打到我都煩,呢啲我了解,嗰時我哋糖黐豆嘛,o依家佢開心,我又鬆動,可以專心工作。」

與第四任有米老婆離婚  63歲夏韶聲:我冇分佢家產!
【此情不再】當年夏韶聲娶得有米靚老婆,兩人經常形影不離糖黐豆。資料圖片

與第四任有米老婆離婚  63歲夏韶聲:我冇分佢家產!
【第三任老婆 03年離婚】
【小三介入】夏韶聲跟第三任老婆BiBi離婚,有傳是梁詠琳做第三者。資料圖片

與第四任有米老婆離婚  63歲夏韶聲:我冇分佢家產!
■87年夏韶聲跟第三任老婆BiBi簽紙結婚,可惜婚姻維持16年後告終。
資料圖片

「佢好似嫁咗人啦」

第四次離婚會否好傷感?他坦言:「冇傷感,幾開心,佢都好開心,其實醞釀咗6、7年,我成日返嚟做嘢,佢做生意唔可以跟我返嚟,大家生活方式唔同,好難落去。佢好似嫁咗人啦,好快咋,佢話有第二個對象話要結婚,梗係簽紙(離婚)畀人結啦。」夏韶聲否認兩人之間出現第三者:「我哋舊年簽紙,但其實分開咗兩年,佢o依家老公非常之有錢。」問前妻是否嫌你冇錢?夏韶聲說:「咁又唔係,呢啲早就知,我係歌手,佢老公係銀行家差好遠。」

由於兩人簽有婚前協議,離婚後不得分身家,他承認:「呢個係佢提議,我都有提議過,佢知我係好人,離婚時佢話多謝我,因為我冇話反對搞搞震要攞幾多錢,我諗都冇諗過要佢啲錢。」問結婚多年Tina曾否送物業、靚車給他?夏韶聲說:「唔需要,自己都有,咁大個仔冇要過人哋嘢,不過我有嘢喺佢度,成個錄音房啲樂器喺佢度,未諗到點攞返嚟。」


■去年62歲生日,回復單身的夏韶聲抱着外孫女切蛋糕。微博圖片

曾傳背妻偷嗒粉絲

問現有否新女友?他自豪說:「女朋友大把,但梗係唔再結婚,19歲到o依家先叫單身,要享受吓,鍾意去邊就去邊,唔使再俾人詐型。」新女友是否有錢女?他說:「唔好提,最緊要阿叔開心。」其實3年前曾傳夏韶聲背妻偷嗒25歲女粉絲Isabel,兩人被雜誌影到返夏韶聲屋企共度一夜,事後他解釋Isabel只是姪女,否認對老婆不忠。

最風流:梁詠琳介入第3段婚姻

現年62歲的夏韶聲,現回復單身,曾經歷4段婚姻,早年他曾接受專訪,坦言離婚誰對誰錯也好,深信離婚只是緣盡,硬要在一起,只會更不開心。

第1段婚姻
夏韶聲19歲時與圈外女友奉女成婚,二人育有兩女,婚姻維持10年。

第2段婚姻
太太為美國人,婚齡只有短短3年。

第3段婚姻
87年與智利籍的BiBi結婚,03年因無綫前藝員梁詠琳介入,導致離婚。男方對BiBi存歉意,曾予女方6位數字過難關。至於梁詠琳,二人最終也因財失義反目。

第4段婚姻
05年於溫哥華演出時結識越南華僑、富家千金Tina,認識4日閃電結婚,於去年7月離婚。

來頭勁:前妻為越南首富千金

夏韶聲的第4任老婆Tina,是越南華僑,有指其父為前越南首富,Tina現時長居美國羅省,從事時裝生意。豪爽的Tina曾豪擲200萬美金(約1,600萬港元),買入4萬呎連花園的獨立屋作二人愛巢,亦曾試過送百萬的名鼓給夏韶聲作玩具。另外,早年夏韶聲曾接受星洲傳媒訪問,指Tina也曾離婚,育有兩名兒子,而他則有兩名女兒,所以互稱對方為「媽咪仔」及「爹哋仔」。

有乜撈:出發燒碟搞漫畫

夏韶聲離婚後返港專心工作,再沒有富貴老婆關照的他,將於本月尾推出Hi-Fi發燒碟《諳5》,翻唱呂方《聽不到的說話》、Raidas《別人的歌》等11首歌曲,事隔5年再出碟的他,在唱片業淡靜下仍重本斥資3、40萬做製作費。

另他曾於11年推出創作漫畫《天眼》更兩度再版,現正籌備下一本新漫畫,他昨在電話說:「今次係電影形式,跟上次唔同,另外又有出版商邀請我出自傳,其實我喺82年已經開始寫自傳,當時覺得未夠料同人講,所以一直都冇出。」

夏韶聲上世紀90年代亦曾拍不少無綫劇集,如在陳小春版《鹿鼎記》飾演陳近南、《烈火雄心》、《陀槍師姐2》等。