香港藝人實力非凡，進軍國際並非難事，早年輕輕鬆鬆嘅鄧梓峰一早已經殺入荷里活一級大片《反斗奇兵》，喺裏面飾演主角巴斯光年！荷里活電影商見香港藝人咁好用，就食住條水，搵咗好多卡通人物去扮香港藝人：
《世界童話系列》： Bert飾演戴耀明
由《芝麻街》嘅阿 Bert飾演無綫藝員戴耀明，話說為咗做好戴耀明呢個角色，阿 Bert仲特登剪咗個戴耀明髮型。據稱阿 Bert重溫咗好多戴耀明做過嘅劇，對演活佢最擅長嘅智障人士同帶有喜感嘅小混混角色，十分有信心。
《反斗奇兵》系列：彈弓狗飾樊少皇
由活力十足嘅彈弓狗飾演功夫高手樊少皇，身手方面彈弓狗無疑未及得上樊少皇，不過觀眾認為彈弓狗嘅眼神絕對交到貨——對眼真係好鬼似樊少皇囉！
薯蛋頭飾蔣志光
據說薯蛋頭先生為咗代入角色，曾經學蔣志光喺皇后大道中唱咗幾日「為何無皇宮」，去參透嗰種鬱鬱不得志嘅感覺，結果都相當令人滿意。
幸福祖飾演李家鼎
當年美國廠商生產呢個以鼎爺為藍本嘅公仔時，確實有擔心過呢個公仔煞氣太重，恐防啲細路仔會俾佢嚇親㗎。
Ursula飾演魯芬
迪士尼《人魚公主》裏面嘅壞蛋角色 Ursula表示，初時知道自己要以魯芬嘅形象扮美人魚，確實多少感到壓力，畢竟美人魚同魯芬，呢兩樣嘢好似都幾矛盾嘛！
結他他老伯飾演元華
來自《咕嚕咕嚕魔法陣》嘅結他他老伯話，細細個就睇元華做戲，而佢所跳嘅結他他舞，靈感亦都係取自元華先生喺功夫片入面嘅演繹。