林盛斌（阿Bob）昨晚喺錢國偉婚宴上飲大咗，先食煙，被側田拉走；之後上台唱歌時，未知是否因為撞來撞去發生啲乜嘢衝突，據知就係古惑仔幾個台上唱緊《友情歲月》，突然阿Bob出現台上仲搶風頭，陳小春不滿，及後阿Bob被拉下台，陳小春爆粗之餘仲想下台追打Bob，被眾人拉住。

阿Bob後來俾人拉咗入房「訓話」，再將佢拉走離場。本以為Bob走咗，點知佢自己去而復返，上番去同小春耍冧。大家驚佢哋又出事，於是上前分番開兩人，但阿Bob堅持要道歉，於是又走番上前，眾人又再將佢兩個分開，就係咁反反覆覆，此時「陳浩南」鄭伊健亦介入，見小春似是一臉不滿，最後仲點煙。凌晨1點，阿Bob終於肯走了。

阿Bob由梁烈唯（唯唯）扶住走，記者不斷問你咪有唔愉快事件，有冇問候人，又有冇俾人問候，佢同唯唯都只係答:「冇事冇事，冇冇冇，好啦夠啦，冇事。」

記者問佢會否唔再飲咁多？阿Bob話:「其實我唔係飲好多之嘛。」但Bob個樣明顯醉爆，眼鏡仲放喺額頭。問佢有冇俾人問候，佢好大反應:「我俾人問候？」

之後就話:「Wilson結婚我係好開心嘅，我真係好開心嘅。」有冇同小春道歉？佢話:「兄弟嚟嘅，冇事，夠啦。」記者再三追問，Bob就捉住唯唯連咀三次話同唯唯最friend，又向記者V晒手先上車。

林曉峰頭先走嗰陣，被問及發生何事，佢就否認有爭執，謂:「千祈唔好咁講，大家都係戥一對新人開心，完全冇爭執，係為氣氛啫。」又謂:「我發現我哋娛樂圈嘅朋友，其實就係好放鬆嘅，佢哋只係識四個字，就係恭喜發財。阿Bob講咗，小春回應唔切，所以佢只係講咗話『多謝晒』，咁就四比三輸咗，我哋決定擇日重賽。」

問林曉峰可聽到小春爆粗？佢話:「我諗我係時運高，聽唔到。在我嚟講，我哋娛樂圈全部都係斯文人嚟嘅。我哋講親嘅，都係四字成語，恭喜發財，身體健康同學業進步。」

Bob小春爆爭執 Wilson話係「氣氛」

新郎哥錢國偉（Wilson）離開婚宴會場時，被大批傳媒追訪，問到Wilson喺咪有啲唔開心？佢話：「冇呀，點解會有少少唔開心呢？」講到有指林盛斌（Bob）同陳小春爆爭執？Wilson為兩人講說話：「其實冇，大家開心為我喜事而開心，咁少少…呢啲叫做..氣氛，有少少氣氛，跟住後面冇事。」

係咪有掟咪？Wilson再說：「冇事冇事，呢啲係表現出我哋歲月友情嘅氣氛，（係咪有爆粗？）平時都有啦，我覺得冇問題，最緊要大家好開心，大家為咗我喜事嚟，無論如何點都好，佢哋到最後都好開心完成今晚喜事，我覺得好高興。」

佢哋係咪由後門走咗？Wilson說：「唔係，到最後都冇事吖。（唔見佢出嚟？）我點知吖？總之多謝大家，大家都係因為我喜事而嚟，到最後大家盡興咁就得0架。」係咪Bob辣着小春？Wilson再話：「我唔知事情經過，總之阿Bob到最後同我講，我同佢電影會繼續，我會搵佢客串，而小春我亦會繼續，我會做歲月友情演唱會，所以大家係我朋友。」

咁你會否做和事佬？佢話：「和咗啦，已經冇問題，係，大家都係好朋友。（Bob飲到好醉？）Bob因為我嘅喜事而開心，小春就因為伊健及所有兄弟喺度都開心，其實我覺得冇乜嘢，大家都係兄弟。」有指啲人上台分開佢哋？Wilson只話：「冇嘢嘅，呢啲氣氛嚟啫，電影都有啦，起承轉合，頭先係起﹑承﹑轉，0依家就合就冇事。」有指新娘子陳宛蔚被嚇倒？佢話：「沒有，她已經習慣。」

陳小春事後接受訪問時表示事件已經解決：「件事解決咗架喇，冇晒問題，多謝大家關心。」據知，陳小春在Wilson和一班好友的Group Chat中向Wilson道歉，而Wilson就表示自己沒有放在心上。現時身在深圳開工的錢國偉透過電話回應：「大家都係兄弟、朋友，好小事啫，朋友都會間唔中鬧吓交、發吓牢騷啦，大家都係開心，飲大咗。佢兩個都有講唔好意思。」