故事由一句粗口開始。人稱「甜筒輝」的鄭文輝，成名於周星馳電影《喜劇之王》，人蠢雖然冇藥醫，但懵卻可以財源廣進，由場記開始入行，因為「XX懵懵食甜筒」而被封甜筒輝，卻意想不到因而被星爺睇中成為星之綠葉。雖然過往經常被星爺整蠱，把他灌醉又點他食一生人最抗拒的魚生飯，但有感自己是新人，惟有硬啃。甜筒輝說：「我呢生人最難食一碗飯，就係周星馳點畀我食。」

現年39歲的鄭文輝可能沒人想起他是誰，但只要一講起甜筒輝，就會想起周星馳電影《喜劇之王》中，帶住粗金鏈食住甜筒找李兆基收陀地費的那位小角色，戲中他攻擊李兆基的「小基基」一幕，最令人印象深刻。

■甜筒輝唔係蠢，係懵，更成功懵出一個經典角色。

懵到成日俾人鬧

參演過《行運一條龍》、《食神》和《喜劇之王》三部星爺電影的甜筒輝，日前接受訪問，坦言當年入行一心想當編劇：「我冇諗過演戲，由頭到尾只係想做編劇，喺《食神》幫星爺做編劇做場記，有日佢突然同我講聽日客串，不過因為我口窒窒，佢即刻扭咗我個角色做口窒窒大學生，『哈哈哈佛大學，劍劍劍橋大學』就係咁嚟。」不過令他出位的，不是《食神》的口吃大學生，而是《喜劇之王》的甜筒輝，他笑說：「我第一套戲係李力持執導嘅《十兄弟》，由做場記做起，要記晒道具、服裝，但我當時真係好懵，經常記錯記漏，成日俾副導演鬧，佢話我太過XX懵懵『你叫阿輝，XX懵懵食甜筒，就叫甜筒輝啦！』一叫就叫到全行都識。」

星爺拍戲之餘更喜歡整蠱人，甜筒輝當然不能倖免，他說：「有次同星爺喺間高級日本餐廳傾劇本，佢冇問我之下點咗兩個魚生飯，對我嚟講，魚生飯係非常非常難食，因為我本身唔鍾意食魚生，覺得魚生加飯仲不知所謂，但當時星爺叫咗我就要食，冇理由唔食，佢仲問我好唔好食。我呢生人最難食嘅一碗飯，就係周星馳點畀我食。」

■由做場記入行的甜筒輝，亦做過編劇。

「佢點玩我冇得嬲」

還有一次，星爺明知甜筒輝酒量淺僅飲橙汁，於是夾埋酒保將酒偷偷加入橙汁內，令甜筒輝飲醉。雖然經常被星爺整蠱，甜筒輝完全唔敢嬲：「以前新入行好green，佢點玩我都冇得嬲，但據聞我唔算重災區，李健仁先係重災區。」
歷年來不少跟星爺合作過的人都反面收場，向太陳嵐近日亦炮轟力數星爺不是，未知跟星爺合作三年的甜筒輝又如何？他坦言：「我始終打佢工，同佢之間利益關係較少，可能我未去到呢個level同佢有衝突。」

日做兩份工買樓

甜筒輝第一份工是在匯豐銀行做電腦繪圖，因為悶所以報讀永盛電影公司編導班，由場記做到編劇，僅做了幾年便離開，日間在《蘋果日報》做副刊編輯，晚上在有線工作，為美國動畫劇集《衰仔樂園》香港版擔任監製，他說：「人生30歲已經供甩第一層樓都係靠呢兩份工。」

之後甜筒輝做過漫畫編劇，半年前再轉職做網絡媒體編輯，做回編劇老本行，他說：「幫客戶編寫網上廣告劇，透過網劇去宣傳產品。」不過，甜筒輝近日亦心癢戲癮起，在鄭中基執導新片《神秘寶藏》中扮演黃子華的擦鞋仔，重出江湖。

■甜筒輝（左）坦言試過俾星爺整蠱。
《喜劇之王》劇照

■甜筒輝（中）在《食神》飾演口吃大學生。
劇照

■甜筒輝直言李健仁（右）經常被星爺整蠱。資料圖片

■甜筒輝08年結婚後，妻子生下囡囡天悅，今年已經4歲。