無綫合併星煥唱片組成星夢娛樂集團有限公司，今日在尖東舉行成立典禮，身為星夢行政總裁的何哲圖（Herman）率領「星夢」歌手，包括鄭俊弘、鄭世豪、羅鈞滿、王君馨、姚兵、許廷鏗、吳若希、胡鴻鈞及謝文欣出席記者會，各大電台高層、音樂人及業界人士現身支持，無綫助理總經理區偉林及無綫製作資源部總監樂易玲亦有到場。

鄭俊弘（Fred）被何哲圖點名成為明年第一個出碟的旗下歌手，明年5、6月出碟，Fred表示很高興，希望至少有一首歌是自己創作。問緋聞女友姜麗文可有送上祝賀？他害羞地說：「好多朋友都未恭喜我。（生日送咗咩畀你？）一個好大好Surprise嘅Party囉。」對於被老闆力捧，Fred被問對來年新人獎是否有信心？他以一貫官方答案回答：「第一張唱片我一定會畀最好嘅心機做，如果有獎就係Bonus啦！（你愈來愈忙，有冇時間陪女友？）哈哈，邊個都冇時間陪啦。」

穿上連身裙騷長腿的王君馨，在台上講感受時竟「爆喊」，雖然成功博取出位，但卻嚇得眾人目定口呆，她說：「收到簽約星夢消息，覺得好唔現實，感覺夢想成真。」

吳若希（Jinny）問到是否簽下五年經理人及唱片約？Jinny承認說：「同星煥其實仲有4、5年約，所以簽星夢都係差唔多呢個年期。」她透露無綫開出的條件很好，她說：「好開心同滿意。（擔唔擔心何哲圖只捧鍾嘉欣？）唔驚，大家都好錫我。」對於鄭欣宜日前向大家透露新合約中列明每月有底薪，Jinny說：「乜TVB人唔係個個有底薪㗎咩？我一向都有，始終穩陣啲，家庭環境唔係好好，當年簽星煥都有底薪。（加人工？）加咗少少。（抽佣少咗？）都係，始終依家唔係新人。」

何哲圖被問為何不見鄭欣宜出席？他說：「因為仲有啲細節未傾好。」問星煥是否「摺埋」？他說：「唔係，只係明年開始唔會投放資源做歌。」由於「星煥」歌手謝安琪及組合Super Girls（SG）不肯賣斷經理人約，故不簽約星夢，問兩人的「星煥」合約如何？Herman說：「所有星煥歌手o既合約係提前終止，我會提供畀佢哋音樂上發展方向。（賣畀其他唱片公司？）總之有3、4個方案啦！」

區偉林在台上表示歡迎任何作曲、填詞人加盟，又宣布《勁歌金曲》將改政策，他說：「以前歌手要簽無綫歌星約先可以派歌上嚟，2014年我哋取消呢個政策，公開畀所有歌手、友好同唔友好嘅唱片公司，開放呢個公平機會。」區偉林強調會堅持全民投票，他說：「唔想畀人覺得小圈子同黑箱作業。」

講到緋聞女友姜麗文，鄭俊弘就封口話唔好講。

雖然兩個力爭一哥，但鏡頭面前仍然好friend。

許廷鏗同樂易玲同何哲圖密密傾，唔知同失落一哥地位有冇關呢？

今日王君馨晒住長腿嚟。

真謝安琪冇嚟到，「翻版謝安琪」吳若希就喺到。

講緊感受。

忍唔住落淚。

星夢CEO何哲圖話鍾嘉欣只係要拍劇，所以唔嚟。

無綫助理總經理區偉林就宣布《勁歌金曲》會改變遊戲規則。

無綫成立星夢娛樂，搵余詠珊老公何哲圖做CEO。今日呢個大日子，樂小姐當然要畀面撐場。