星夢幫進軍《老表2》 鄭俊弘羅鈞滿鬥唱鬥戲

由郭晉安、王祖藍、萬綺雯同王菀之主演嘅《老表,你好嘢!》,今年初播映時叫好叫座,無綫決定原班人馬開拍續集。喺《老表》入面,祖藍、陳嘉佳(細細粒)、王菀之同陳明恩有隊歌唱組合「Oh Baby」,聽聞今次《老表2》會加重歌唱比賽戲份,由於近期無綫唱歌比賽《星夢傳奇》好收得,監製有意拉攏《星夢》一班參賽者加入《老表2》演出,包括高分王鄭俊弘、羅鈞滿、何傲兒、張景淳同李璧琦等,等佢哋喺新劇中發揮吓歌唱天份。《老表》加《星夢》,聽落真係好有睇頭!


■《星夢傳奇》令鄭俊弘、羅鈞滿等成功彈出。
電視圖片

好鬼興奮

噚日問到《老表2》監製黃偉聲,係咪有構思搵埋《星夢》參賽者拍續集,佢話:「o依家劇本仲喺創作階段,我哋唔排除呢個可能。」對於有機會參與《老表2》嘅鄭俊弘同羅鈞滿噚日喺電話聽到都好興奮,鄭俊弘話:「好有興趣,可以唱歌同拍劇,一舉兩得。」羅鈞滿就話:「唔好話唱唔唱歌,有得參與呢部劇都好開心,之前我都有喺myTV睇番晒成部劇,因為自己好少參與呢啲輕鬆劇,所以好想有機會參與。」

《老表2》出年3月開拍,由之前20集加到25集,原本無綫想搵埋張敬軒演出,同王祖藍爭王菀之,但聽聞軒仔出年5月要同黃秋生演舞台劇撞咗期,所以未必能夠成事。


■《老表,你好嘢!》叫好叫座,無綫決定原班人馬出年開拍續集。
劇照