無綫《星夢傳奇》今日喺將軍澳電視廣播城，錄影「星夢幫VS巨聲幫」版。評判方面又唔同咗人喇，今次係肥媽Maria﹑倫永亮﹑恭碩良及陳奐仁。計計下，呢個節目先後出現過多位評判囉，之前有葉蒨文﹑巫啟賢﹑周啟生﹑趙增熹﹑鄧智偉﹑李克勤及譚詠麟等，換評判次數都換得幾密。

高分王鄭俊弘（Fred）過往幾集成績都好標青，佢今次被安排同許廷鏗合唱《青春頌》對戰。Fred獲多位評判讚賞，加上噚晚升呢，擔任巫啟賢演唱會嘉賓，自然備受矚目。

對於同Fred合唱對戰，許廷鏗就話：「大家都好平均，可以互相幫對方，希望雙贏。今次係PK賽，但唔會睇成係比併。」

許廷鏗又大讚Fred：「Fred（鄭俊弘）把聲好好，好有感染力，不過我返到呢個台，覺得好大壓力，但又好期待。」

Fred就話：「今次巨聲冇個人分數，星夢就有。」Fred最後獲得178.3分。

而羅鈞滿請來李璧琦合唱《日與夜》，二人對戰何雁詩和羅孝勇合唱《Lucky》；林子博和張景淳合唱《最佳損友》對戰謝東閔、吳業坤和陳國峰合唱《命硬》；至於唱《男旦》的姚兵單挑唱《怎麼說不愛我》的劉威煌。經過一輪比賽後，羅鈞滿獲165.9分，林子博則得到158.7分。

兩人惺惺相惜。

張文采男朋友羅鈞滿（右）請來李璧琦合唱。

張景淳

評判倫永亮同肥媽作狀咀嘴。