許亦妮同TVB簽長約 寄情工作唔拍拖

2011年香港小姐季軍及「最上鏡小姐」許亦妮(Whitney)自簽約TVB做親生女以來工作機會不斷,《老表,你好嘢!》中,凸眼演繹巴辣港女,帶旺人氣;剛播映完的《師父,明白了》飾穿男裝的爽朗女捕快,形象正面,令打從選美開始負面新聞不絕的Whitney成功洗底:「我同TVB簽咗長約,畀晒青春公司㗎啦,反正做咗藝人後好難識到男仔,咪疊埋心水做嘢!」

採訪:方騫平 攝影:畢紹基 服裝:Manita Grace

24歲、擁35D導彈的許亦妮青春無敵,唔只身材激凸,連新聞都咁出位,參選以來是非多籮籮,留學英國的她被指專向有錢男仔下手,仲連溝13男!集郵事件簿成呎厚。

鍾意拍長拖

重提傳聞,Whitney無可奈何:「話我專識有錢仔?只係咁啱啫,我唔會用呢樣嘢去衡量識男朋友,有錢就話有錢,冇錢又話貼仔,咁講會扭曲咗女藝人嘅價值觀,令人對女明星產生誤會。其實有冇錢係其次,兩個人相愛先可以走埋一齊!話我連溝13男,我好唔開心㗎,咁講第日仲使嫁人?真係唔想嚇走人呀,按編故事嘅進程,咁家陣我應該有100個男朋友,唔通一歲就開始拍拖?其實我係鍾意拍長拖嘅人,拍散拖嘥時間,太無聊啦!」

揀圈外男友

之前她在微博留言「心如刀割」,暗示感情觸礁被飛!她不願多提傷心事:「過去嘅唔想多講,總之我冇男朋友!」同時,Whitney慨歎入行後,搵男友唔容易:「一般男人係唔會鍾意女明星,除非自信心爆棚,我就等緊呢位自信心爆棚嘅Mr.Right,但肯定唔會揀圈中人,前輩曾提點我話,男藝人冇安全感,經濟唔穩定,出面引誘又多,與其有機會唔開心,不如唔好揀。佢哋講得有道理,都係出於愛錫我加以提醒啫。」

現時許亦妮專心工作,《師》一劇首次拍古裝,她說:「我最想試現實生活中做唔到嘅角色,好似做奸妃、間諜咁,媽咪就想我做公主。」
現時Whitney專心工作,《師》一劇首次拍古裝,她說:「我最想試現實生活中做唔到嘅角色,好似做奸妃、間諜咁,媽咪就想我做公主。」