亞視玩完，咪以為無綫可留得住啲花旦小生。事關今年大把阿哥阿姐約滿北望神州，加上now的港娛開台要招兵買馬，無綫花旦、小生買少見少。造就今年 5月約滿的徐子珊，有機會發圍。
約滿在即，據知無綫搵樂易玲出手留人，除了年薪加到 120萬，並拍心口為徐子珊度身訂造劇集，谷她攞視后。咁多甜頭，難怪徐子珊心郁郁，續約機會八、九成！
不過，與徐子珊平起平坐的鍾嘉欣，就被迫坐歪，暫時今年只係得一套劇《華麗轉身》 4月尾播。要爭視后，徐子珊睇高一線。

刮痧瘦腳
徐子珊為咗隻腳靚啲，刮咗 3日痧，搞到大撻瘀痕，好似遭到家暴咁。

即將約滿無綫的徐子珊，近兩個月與無綫處於膠着狀態，事關她一日未簽字續約，無綫亦不會安排新劇給她。冇劇一身輕的徐子珊，最近除了為《以和為貴》宣傳外，亦忙於為詩琳拍纖體廣告。
今次她在新廣告中穿上火紅 bra top加熱褲，形象野性。由於露腰又露腿，新年食大咗的徐子珊，為了減腿及去走包包面，半個月前開始節食做運動，更刮痧去水腫。她說：「為咗影相靚啲，我之前去咗刮痧同通淋巴，連續刮咗三日，搞到隻腳瘀晒。」

子珊加薪 15%

5月約滿無綫的徐子珊，近日已經獲公司約見傾續約。無綫在花旦買少見少的情況下，出盡法寶留人。雖然藝員部現由余詠珊及曾勵珍揸旗，樂易玲失勢，但由於樂過往湊開花旦，與她們稔熟，故無綫今次亦找她做說客，出招利誘徐子珊續約。
「子珊有諗過向外闖，但佢知自己大陸巿場暫時仲未得，加上今次無綫俾佢嘅 offer都唔差，包薪多了近 15%，年薪 120萬，爆騷另計。無綫又講到明，只要她肯續約，即刻開部大劇俾佢，角色為她度身訂造，更會安排成為台慶劇，谷她攞視后。另外，無綫拍心口開戲給她，構思一個以女性為題材的劇本，希望趕在聖誕檔期上映。」

《華麗轉身》之後，嘉欣今年暫時沒有其他大劇擔正，視后寶座無望。

徐子珊 12年憑《雷霆掃毒》攞到「我最喜愛的電視女角色」獎，幾乎笑到見牙唔見眼。

鍾嘉欣 06年在無綫攞過「飛躍進步女藝員」獎，當年她喊到好似劏豬咁。

嘉欣失寵變配角

近日有傳鍾嘉欣嫌男友伍允龍事業冇成績，提出分手，結束 8年情。愛情冇咗，事業又有阻滯，嘉欣認真黑仔。

反觀休息了好一陣子的鍾嘉欣，過去兩年忽然失寵，由高峰期一年六劇，減至一年一至兩劇，氣勢大不如前。最近有指即將開拍的《巨輪II》會加入珍姐愛將陳凱琳，而鍾嘉欣就會由上集的女主角變成客串。
雖然後浪陳凱琳同蔡思貝正面衝擊，鍾嘉欣仍唔識驚，早前趁假期忙玩煮飯仔，並跟馬浚偉學廚藝。月中才復工，與王祖藍飛往內地拍大陸劇《哪吒》，一飛便個多月， 6月才與黃宗澤開拍無綫劇《警犬巴打》，分分鐘明年先出街。

事業愛情兩不順

徐子珊與鍾嘉欣並非第一次拗手瓜。去年，徐子珊取代鍾嘉欣成為詩琳代言人，搶完廣告又爭做一姐，兩個認真寃家路窄。
事業不順利，愛情也觸礁。有指鍾嘉欣家人嫌伍允龍冇出息，一直反對兩人戀情。她不堪壓力，最近向拍拖 8年的男友，提出分手，為了決絕斬纜，更向外宣稱單身：「我依家只係有朋友！」睇唔出嘉欣 BB都咁辣！

着住 7吋高踭鞋吹風扇，效果就好飄逸，但子珊企足成個鐘，拍完腳都震埋。

徐子珊換上 Haider Ackermann藍色晚裝，從休息室走出影樓準備攞高踭鞋着，老闆陳生突然失驚無神幫子珊挽鞋，子珊即說：「受唔起、受唔起呀！」

為咗展示子珊嘅美腿，工作人員不惜將萬五元嘅長裙剪爛。

徐子珊鍾嘉欣由纖體廣告代言鬥到爭視后。