由於亞視與香港馬會播放《六合彩》嘅合約完結，今晚就係雙方本合約期內，亞視最後一次播放《六合彩》，雙方長逾35載嘅合作關係，亦隨之完結。今晚之後，亞視就會同六合彩講bye bye喇…自星期六（8月1日）起就轉由無綫J2台播放。

六合彩之子蔡國威主持《六合彩》十年，形象深入民心。亞視執董葉家寶特別送贈一塊刻有「馬到功成」字樣嘅金牌，感謝其多年付出，及祝願未來事事亦馬到功成。

今期投注總額係$38,680,000，多寶獎金係$8,000,000，好喇，講番第88期六合彩攪珠結果，係：
4，5，11，17，24，48
特別號碼：46

今晚(亞視)六合彩大結局，蔡國威讀完晒所有稿、交代埋下一期六合彩攪珠係8月1號星期六晚上9點半舉行之後，蔡國威轉過身，隨鏡頭轉向另一邊，說：「喺呢度再次感激大家嘅支持，我哋有緣再見。」說罷，蔡國威很瀟灑地舉起佢隻右手，說了一句：「Bye Bye！」

以後只能在亞視歲月留聲台重溫亞視版《六合彩》了

蔡國威感不捨：差啲喊出嚟

蔡國威之後接受訪問，講下正式做完主持感受，佢話：「完喇完喇完喇，真係做完喇，今晚係我最後一次做六合彩攪珠啦，咁就真係有啲唔捨得，但成個過程內，盡量控制自己（情緒），希望自己以正面心態做好佢，直至係最後嗰句，再次『多謝大家支持，我哋有緣再見』，縱然我知道呢個機會率唔係好高，但係我都希望就算1%都好，我都希望有機會喺《六合彩》同大家見面。」

蔡國威又謂鏡頭前情緒控制得好好，佢話：「但做完後，馬會同事好好，送咗一份小禮物畀我，令到我好感動，反而令我喺幕後差啲喊咗出嚟。」

佢續說：「同埋我放工走時，都唔捨得換我套衫，平時？我九秒九換咗套衫喇，點都好，最後希望新主持能一切順利，六合彩繼續惠澤到好多市民，同埋希望大家六合常中。」

J2接棒播放《六合彩》

無綫未播先收投訴

六合彩之後改由無綫J2直播，暫時就冇無綫藝人主持，有消息指有反賭博團體向馬會及無綫投訴，話無綫藝人係年輕人偶像，由呢班藝人主持六合彩嘅話，會變相鼓吹賭風，所以極力提出抗議。

故此，馬會喺呢個過渡期，會用番馬會委派嘅主持人蔡運華主持，做一個月左右，至9月就會用無綫藝人、即落選國際中華小姐范文雅，同藝員訓練班嘅吳珮如任主持。馬會發言人亦承認，唔會由無綫藝人主持，至於是否因接受團體投訴，發言人就表示唔評論。

蔡運華今年35歲，畢業於香港中文大學新聞與傳播系，曾於亞視當實習記者、天氣報告女郎、廣告客戶主任。04年，她曾被亞視與電盈合作推出的24小時新聞頻道選中任主播，但經她深思後，認為自己不太適合，以不想渾水摸魚為由，放棄做主播的機會。

蔡運華喺未接受任何正式戲劇訓練下，選擇成為自由身演員，參與超過50多部劇場作品，包括《夜靜無聲》、《白夜行》等，除了劇場創作，她亦有參與電影演出，如《童夢奇緣》中，飾演劉德華小學同學仔身在內地的媽媽。前年更奪得香港藝術獎的「藝術新秀獎（戲劇）」，成績獲得肯定。

無綫棄用35年主題曲

過往亞視播開嗰首六合彩主題音樂，係嚟自荷蘭樂隊Shocking Blue喺1972年嘅作品《Inkpot》，亞視由1976年7月13號首播六合彩以嚟，都係沿用呢首音樂，除咗無綫喺1997年7月5號至2001年6月28號播六合彩呢4年期間，用咗另一首音樂做主題曲之外，亞視接手播番六合彩，都係用《Inkpot》嘅曲。

依家改朝換代，無綫雖然都會用番《Inkpot》，但因為之前個版本係亞視混音，無綫唔用得，亦唔想用，所以已經搵人重新將首音樂做過mixing。噚晚J2台播宣傳片嗰陣，已經率先試聽，聽落好電子音樂feel，鍾唔鍾意真係見仁見智喇！