曾經信誓旦旦謂要愛永遠愛王菲，9月離婚之後又密集式高調受訪嘅李亞鵬，上周仲喺微博感歎自己寡佬一名連洗衫都要自己嚟，「只好自己熨燙明早要穿的西裝～熨燙著一個人的生活」，之後又貼圖話自己身在廣州同中學同學一起聚會，沒有言辭的安慰，只有快樂和歌聲一起蕩漾——講得白啲，又係話自己啱啱離咗婚，老同學「在心中」，陪佢捱過人生低谷之類，令不少網民對佢萬四分同情(萬二已經唔夠使)，有網民仲安慰佢：「老天自有安排，願一切美好與你相隨」，真係承你貴言。
今日成個微博，舖天蓋地都係李亞鵬——有圖有真相，被拍到於23號晚上，同年輕女子手拖手兼激吻連環圖，之後李亞鵬更造訪女方香閨，共度人生漫長11小時。穿上黑身legging嘅女子，當晚先同鵬鵬去咗餐廳食晚飯，食色性也，食飽飽之後呢，兩口子落到地庫準備取車走人，其間女子好似樹熊咁摟住鵬鵬，兩個人頭就咁扭來扭去激吻，全程都係女方摟實鵬鵬條頸，鵬鵬就順勢攬住佢條腰，睇嚟呢個女伴好主動喎。
之後兩人再拖手仔邊行邊談心，再揸車返女方寓所繼續「傾」。傾到第二日女子一臉春風咁單人出動，好sweet咁講電話。未知鵬鵬傾足成晚之後，會否攰到起唔到身熨衫呢？
9月離婚，11月23號就激吻新歡。 (《搜狐娛樂》圖片)
23號晚，李亞鵬同新歡食完晚飯，一齊到停車場取車，趁無人之際拖手仔。(《搜狐娛樂》圖片)
嘩嘩嘩，女方好主動呀。(《搜狐娛樂》圖片)
扮樹熊摟實李亞鵬，鵬鵬亦順勢攬實佢條腰，咀到啜啜聲。(《搜狐娛樂》圖片)
(《搜狐娛樂》圖片)
呢張清楚啲 (《搜狐娛樂》圖片)
準備上車喇 (《搜狐娛樂》圖片)
笑得幾開心!冧功一流(女方或男方皆適用) (《搜狐娛樂》圖片)
出車喇 (《搜狐娛樂》圖片)
第二日…(《搜狐娛樂》圖片)
王菲喪避 鵬鵬疑已搬出王菲別墅
王菲當日主動同李亞鵬離婚後，有傳係因為第三者，內地傳媒及「花生友」更幫鵬鵬籌齊咗「七公主」———係七個疑似小三至啱，包括花店老闆娘、電影女編劇等等等等。不過，王菲之後於微博幫李亞鵬澄清，稱離婚與第三者無關:「婚是我要離的，沒有第三者，沒有婆媳不和，不牽扯財務問題，不是悲劇狗血劇，和平分手，換一種方式相處，對孩子來說，我們仍然是一家人，謝謝@一号立井（即李亞鵬）用愛和理智包容這一切，感恩 p.s支持@嫣然天使基金不會停（心心符號）內什麼，不會出家。」李亞鵬亦寫道:「孩子她娘，內什麼，永遠愛你。」
愛得兩個零月就有新歡？咪住先，咁「愛」，亦包括親人之愛嘅。但問題係，何以上周李亞鵬仲嘆自己孤寡一人博同情，話咁快就被拍到激吻新女兼跟埋女返屋企？究竟係「速食文化」，定係女方係「七公主」之一？
拿，自從同李亞鵬離婚後，王菲遇鵬鵬如「撞鬼」——避得就避。知道鵬鵬身在香港出席活動，王菲就特登遲啲先返港。亦有傳王菲已將其「基地」由北京搬咗嚟香港，甚至諗住再喺香港置業，同好姊妹趙薇做鄰居。
而內地傳媒亦報道指，日前李亞鵬從麗江回京後，並未回到佢同王菲嘅晴翠園別墅，疑似已搬出愛巢。
新歡係內地7線女星 曾拍《春嬌》最愛王菲
究竟同剛離婚不久嘅李亞鵬激吻再帶男方返家共度11小時(可能呢11個鐘都係教鵬鵬點熨衫)嘅新歡是誰？相片一曝光，已馬上被內地網民「人肉起底」——原來係內地一名「七線女星」，叫做馮靜恩，曾經拍過《春嬌與志明》同《功夫足球》，以及幾部內地作品包括《飛越老人院》、《檸檬》等。內地傳媒曾向與馮靜恩合作過嘅工作人員求證係咪真係佢，但對方冇講「是」或者「不是」，反而曖曖昧昧咁講咗句:「這是藝人私事，不方便回應。」
馮靜恩原名馮靜，籍貫江蘇，福建長大，之後去咗廣州讀書，細細個就參加好多比賽，13歲就拍攝電視劇《功夫足球》出道。最有意思嘅係，馮靜恩喺百度百科中「最愛的歌手」一欄，佢嘅答案，竟然係王菲。
內地7線女星馮靜恩，李亞鵬新歡，參演過《春嬌與志明》，你記得佢嗎？唔記得？正常。
新女多次「食」男星斷正 疑鵬鵬俾人擺上枱炒作
依家，馮靜恩已經唔再係7線，好多網民都對佢感到好奇。
鵬鵬有愛情滋潤係好事，不過事件又馬上觸發「陰謀論」，因為影得太清楚，捉到正一正，令人生疑。李亞鵬被指有小三已經唔係新聞，但斷正就真係冇乜幾可，加上今次仲涉及一個不知名女星，更令人懷疑……係咪放料0架？
鵬鵬呢位新歡，據聞係揸銀色賓士跑車，拎住與王菲同款嘅限量版Hermès鉑金包包，似乎家底幾豐厚。加上又有前科，曾被偷拍到同內地男星何晟銘密會，但有指何晟銘已經親密女友；早前馮靜恩又被拍到同另一內地男星印小天親密返回公寓共度春宵，但事後男方已澄清同馮靜恩只係普通朋友。
馮靜恩被偷拍斷正嘅命中率高到咁，難免就連其他內地傳媒都懷疑——鵬鵬今次係咪俾人炒作0架。鳳凰娛樂聯繫到馮靜恩，問佢:「與李亞鵬在一起的女生是你嗎？」馮靜恩冇出聲，諗咗一陣之後話:「那個我現在不方便接電話，謝謝啊。」
馮靜恩幾乎次次「食男星」都俾傳媒影到，包括今次嘅李亞鵬、之前嘅何晟銘(右上)及印小天(右下)。真係咁啱撞到？
疑點重重 明知有人睇住 李亞鵬仲要咀？
李亞鵬嘅助理接受內地傳媒訪問時，表示鵬鵬係一個好端正嘅人，並唔係外界所講嘅咁樣。佢話:「一般在飯局上，他的習慣是有人敬酒就喝，吃完飯後有人需要送，他就去送，是非常敞亮的人。所以這個事情我也覺得很奇怪，這其中肯定有誤會，可能只是朋友。」
有意思嘅係，李亞鵬咀女斷正嗰陣，除咗有一雙男女主角同狗仔隊之外，其實當時地庫仲有其他人。兩人激吻之時，更有男途人行過兼投注禮，但李亞鵬完全唔理，成個頭「隊」埋去就咀。一係，就係成單嘢男女主角都係夾埋做新聞，一係，可能真係好似李亞鵬助理咁講，「他的習慣是有人敬酒就喝」，俾人「灌醉」咗，貓貓地，咁，就失手「就擒」喇。莫非……真係有人設局想「裝」鵬鵬？