近日網上流傳「每個男人心中都有一個黃翠如」的文章，以洪永城的角度描述與翠如之間「友達以上，戀人未滿」的關係，獲得不少網友共鳴。翠如今日親自寫文章呼應：「享受呢種互相欺負的感覺」、「更加習慣咗，大家手拖著手互相扶持行過紅地氈」，隨即獲大量網友讚好。洪永城與黃翠如一直被視為螢幕情侶，即使雙方先後公開戀情，外界依然視兩人為一對，更為兩人的關係撰文。
洪永城與黃翠如日前在頒獎禮上拖手行紅地氈
蕭正楠就與岑麗香挽手行紅地氈
因為洪永城與黃翠如日前在新加坡《星和無綫電視大獎2015》頒獎禮上拖手行紅地氈，走過人生其中一段路，再次獲網民激讚二人好Sweet和登對。回港後有記者問到會否擔心唐詩詠呷醋？洪永城笑說：「唔會，唔知翠如有冇後悔揀咗Edwin（蕭正楠）！（定係你後悔多啲？）我對佢付出咗無限咁多嘅愛，好可惜佢最後揀咗Edwin！（唔怕女友聽到？）咁我同一時間都對好多愛嘅人付出時間，包括我啲同事。（聽到咁講真係會嬲！）係喎！依家要即刻打電話補鑊！」
曾經，在很多人眼中，或者覺得，黃翠如跟洪永城，才是一對。因為兩人從有線到無綫都經常一起主持旅遊節目，人前人後都好老友，一直被指襯到絕，關係曖昧。因為電視台之前悉心營造出來的幻覺，因為從有線年代遺留下來的集體回憶加上個人情感投射？於是，高登討論區有人貼出「我諗每個男人心裡面都有一個黃翠如」，巴打們素來不大喜歡洪永城（高登巴打覺得洪永城迷戀他們心愛的翠如BB，罪犯天條，高登仔群起而攻之，慘成公敵），可是如今紛紛留言說為之落淚，更封了洪永城做「高登男神」。
《我諗每個男人心裡面都有一個黃翠如》全文
因為這篇潮文，有網媒「蔓珠媒體」就貼了一段以翠如角度出發的文章，叫做《其實，每個女仔心目中大概都會有個洪永城》，全文如下：
人越大越發現成班八婆一齊就好多是非，有時同男仔做朋友簡簡單單仲開心，於是你同佢開始變成特別 friend 嘅兄弟，就好似《我可能不會愛你》嘅李大仁同程又青咁。兩個人出雙入對到身邊嘅朋友都驚訝「下乜你地仲未一齊？」。
有一刻你諗過，你地究竟仲係唔係普通朋友咁簡單，但見佢無乜表示。有次傾起擇偶條件，佢嘅理想型同你差十萬九千里咁遠，「溫柔體貼、賢良淑德，最好就識煮野食」。你自問自己十分粗魯，煮野食喎，唔炸爛個廚房都偷笑。的確佢係對你特別好，但都係唔好諗咁多，人地要追就一早追咗。
洪永城知道咗你同蕭正楠一齊，一如以往地恥笑你「終於有人要拿？」。不久之後，佢都有個唐詩詠，你個心有小小唔舒服。你開始明白一樣野，呢個人係你心目中總係有一個特別嘅位置，唔能夠被任何人取代。你選擇停留於呢種關係，可能係因為習慣，亦可能係因為唔想失去、唔想受傷。
情節嚟到呢度，《我可能不會愛你》嘅李大仁同程又青兜兜轉轉，發現其實自己鍾意對方，最後都係大團圓結局。不過咁戲劇化嘅野就只會喺韓劇、台劇發生，現實又有幾多對李大仁同程又青。有樣野比 friendzone 更加一去無回頭，叫 brotherzone。
有人問咁樣算唔算收兵。哈，諗諗下其實佢都幾似你隻兵。但同時你自己都做緊佢隻兵，一句「喂今晚飲酒」就隨傳隨到。呢個時候你會得啖笑，兄弟呢家野你識條毛咩。
黃翠如現在與蕭正楠相戀
翠如今日於其個人facebook改編潮文回應：「每個人心裡面都有對黃翠如同洪永城，太平實普通，太易代入」，「你哋好似總有D無名的共鳴，人哋永遠以為你哋一對，但你哋心裡面知道無可能」。
文中又指，翠如和洪永城一直很享受現在的關係，可以互相欺負，亦可互相扶持走過紅地氈。後來兩人宣布拍拖，直至難得一次工作上的機會，讓彼此可以再牽著手，「隔咗一兩日見到張相，心中比微笑和流淚更多，我們都很想用所有的心去祝福大家：『走完紅地氈，台上的路，希望你/妳走得更加好。』」
當中更有一句意有所指，似暗示洪永城先鬆開手：「有一天 洪永城說 他已經找到他的她 要鬆開手 先上台 黃翠如有點感性 送上祝福」令網民有無限幻想！黃翠如這篇「潮文」一出幾個小時，已經有3萬多個讚好，看來大家都好有共鳴！
洪永城現在與唐詩詠相戀
黃翠如全文如下：
每個人心裡面都有對黃翠如同洪永城 太平實普通 太易代入
有點嘈 有點吵 你哋好friend
一齊嗌交 一齊講心事 一齊去旅行
但係永遠唔會撻著
你哋好似總有D無名的共鳴
人地永遠以為你地一對
但你哋心裡面知道無可能
當朋友甚至親人問起
黃翠如回答「我鍾意陽光型運動型感性型開朗型活潑型總之不是洪永成個臭八公型」
洪永城回答「我鍾意陽光型運動型性感型開朗型活潑型總之不是黃翠如個臭八婆型」
你哋好享受呢種互相欺負的感覺 你地更加習慣左 大家手拖著手互相扶持行過紅地氈
然後有一天 洪永城說 他已經找到他的她 要鬆開手 先上台 黃翠如有點感性 送上祝福
然後 黃翠如繼續一個人在紅地氈上走呀走 有一天 她跟洪永城說 她好像也找到了她的他 洪永城說 乜自閉都會拍拖？
難得有一次工作上的機會 黃翠如同洪永城手拖手。。。
隔左一兩日
見到張相
心中比微笑和流淚更多
我們都很想用所有的心去祝福大家 「走完紅地氈 台上的路 希望你/妳走得更加好。」
網民指黃翠如的改編比原版更動人，有網民感嘆「能成為密友大概總帶着愛」，又有人表示期待洪永城會怎樣回應，但一名似乎有點悲觀的網民就作出結論：「熒幕情侶永遠只能在螢幕上做情侶。」