去年11月奉子成婚的陳自瑤（YoYo），產後半年即復出拍劇《師父．明白了》！她自爆咁快掟低囡囡復工並不是急於搵奶粉錢，只是想靠開工來解悶，治療她做全職媽咪時患上的焦慮症：「因為全副精神用嚟湊女，搞到個人好緊張，情緒好有問題，老公知道我鍾意拍戲，就建議我開工，好好enjoy，平衡一下生活！」工作後，YoYo果然不藥而瘉！

初為人母的陳自瑤復出拍戲好快便適應過來，而且能放輕鬆拍，跟以前只緊張個人表現的心態完全不同，故拍得特別enjoy：「雖然有咗家庭，但會照接工作，唔會減產，我好想兩邊兼顧，淨係湊仔實在太悶，女人要keep住工作先會對自己嘅外表有要求，否則變成師奶，我唔會俾自己走向呢條路，只會做個潮媽！」

原來YoYo湊女的日子，情緒變得極度緊張，疑似患上焦慮症：「囡囡半歲時，我只係睇漏一眼，啱啱轉身，連房門都未打開，但佢經已反身跌咗落牀，儘管醫生檢查過話冇事，但喺觀察期內，我擔心得要死，直至一個月後冇問題先安心過來，連老公都覺得我過分緊張，要搵嘢去平衡。」YoYo自稱不是「怪獸家長」，但也緊張女兒的未來，所以也會報讀面試班，參加Playgroup及挑選興趣班等，她無奈道：「王浩信一句話要開工，呢方面交俾我搞喎，搞到我好頭痛，所以再追多個嘅大計要押後。」

介意做師奶

退下火線的YoYo唔介意《師父，明白了》由新貴黃翠如擔正做女主角，她說：「角色唔係由演員決定，做好自己本份就可以啦，佢都做得OK。」至於升任媽咪角色又如何？她則說：「視乎劇本而定，家陣好多角色都未必結婚先有細路，只要唔師奶都OK喎。」

為免變師奶，YoYo更加要Keep住開工，保持最佳狀態。

因為本身瘦底，所以產後的YoYo極速回復Fit爆身段。