人需要一個婚禮還是一段婚姻，相信很多人都會理智地選擇後者，要一個華麗的婚禮，但沒有一段可以長廂斯守的婚姻又有何用呢？鄭嘉穎坦言，既想慎重地找個終身伴侶，亦想生兒育女，他就是這樣簡單，因他想要的是「家」。蒙嘉慧有個單純正直的男友，得到了女人最想要的安全感，所以她覺得大家相處的過程才是最重要。

＜採訪＞曉妍　＜攝影＞Gary　＜服裝＞I.T.（蒙嘉慧）、Diesel（鄭嘉穎）

鄭嘉穎和蒙嘉慧（YoYo）繼《爭分奪秒》和《與敵同行》後，今次是第三度合作無綫新劇《Only You只有您》中飾演一對歡喜冤家，經常火星撞地球，嘉穎笑言常以「中港女」稱呼YoYo，意思是嫁不出的中年港女，嘉穎笑說：「喺劇入面，YoYo啱啱被男朋友飛咗，其實呢套劇係講好多男女之間嘅關係，我同YoYo初初見面都好唔順眼，佢要求高，又貪錢，係一名典型嘅港女，不過我係吊兒郎當、不修篇幅嘅攝影師。」

YoYo聞後立即向嘉穎反擊，哈哈大笑說：「我係中港兩地嘅專業女性，嫁唔出無問題，有Friend咪得囉，有報道話人一生之中，最終可陪自己到老嘅就係姊妹，人生有唔同過程、階段，都係朋友喺自己身邊，我唔鍾意有異性無人性，呢啲人遲啲就知死。」

互相產生默契

對於第三次合作，大家當然互相產生默契，嘉穎大讚YoYo有進步，做得很好，有幾場戲更能感動到嘉穎，他說：「有時女人嘅心態，男人唔會知道，因為男人睇女人係好表面。女人係好介意世俗眼光，被人話剩女，話唔介意其實係介意嘅，內心就會好大壓力，YoYo做到呢個心態出嚟，感動到我，就會感動到觀眾。」

被嘉穎這樣讚揚，YoYo坦言感到很開心，但原來兩人之前合作兩次時並不熟絡，猶如隔了一道牆，難以捉摸對方，她說：「可能我哋兩個好被動，好慢熱，對唔熟嘅人會唔多出聲，今次係阿田（田蕊妮）幫我哋行前一步，真正接觸之後，我發現大家其實好相近，我對佢都好信任，佢唔會做新聞，不過佢好直，但唔係壞。」

媽媽放棄催婚

提到現實當中，嘉穎仍是孤家寡佬一名，不過他認為男人還好，笑言鄭媽媽已放棄他，再沒有催促他，但嘉穎竟然卻想有自己的小朋友，他說：「唯一係想要小朋友，年紀唔可以太遲生，依家唔係話難唔難遇到對象，只係自己嘅圈子太窄，我一向都無分圈外定圈內，覺得適合就得，當然啦！搵圈內人有個好處就係會明白我嘅開工時間，如果同圈外人一齊，十年都唔見一次，未必會咁明白，跟住自然會有好多問題發生。」已踏入四字頭的嘉穎，坦言如果找到對象，都會視對方為終身伴侶，所以他會慎重地尋覓，他說：「梗係要白頭偕老啦！我生活好簡單 ── 有個家，咁樣就做到修身齊家治國平天下喇，所以我依家要收身Keep Fit呀！哈哈！」嘉穎透露，4月會開拍新劇《拳王》，屆時會安排他有個七八歲的兒子，可暫時讓他一嘗做爸爸的滋味。

無向伊健要求

而YoYo指《Only You只有您》可以令人反思，能夠體會到很多事物的一套劇，她說：「大家喺人生中會有好多經歷，當中會有矛盾位，所以大家就會有摩擦，好似嘉穎喺劇中係個浪子，但其實有好多女仔都鍾意安全感，我以前都曾經要求過男朋友，但男人有計劃係唔會講出嚟，咁點解又要求人哋做呢！」問到YoYo有否要求男友鄭伊健有計劃？她說：「無諗過，大家一齊嘅過程重要啲；年三十晚我嘔，大年初一發燒，我唔想新正頭要入醫院，於是我飲咗罐寶礦力，但係佢叫我打機出身汗，我心諗不如畀我瞓吓啦！所以人大咗就會唔同，我反而覺得佢呢個提議好可愛，出發點都係好好。」

《Only You只有您》

典型的港女的麥一敏（蒙嘉慧飾演）性格愛面子，將弟弟麥一鳴（李雨陽飾演）的婚禮辦得富麗堂皇，後來麥一敏失業，決心加入婚嫁行業，向「金牌大妗姐」莊思甜（李司棋飾演）拜師，可惜遭到對方拒絕，麥一敏心有不甘，於是與莊思甜反目的另一大妗姐黃美好（馬海倫飾演）報讀大妗速成班，再加入Only You婚紗攝影公司；此時，麥一敏認識攝影師夏天生（鄭嘉穎飾演），兩人初時見面就火星撞地球，成為歡喜冤家，但他們經歷了很多，最終變成戀人。故事中再帶出十二個婚禮十二段愛情故事，包括「難為大姑奶」、「我的賤格前男友」、「釋囚的婚禮」、「驚情」、「我有一個夢想」、「殘缺的完美」、「佢老公係大佬」、「豪門婚禮」、「媽媽我嫁了」、「我的印度老爺」、「最後的花嫁」和「暮年之夢」。

播出日期：21-02-2011，逢星期一至五晚上八時三十分