張馨予上年同吳卓羲分手後火速搭上內地人氣男演員李晨，但聽聞張馨予近日同陳喬恩男友霍建華撻着，狠撇李晨。聽聞李晨好鍾意張馨予，知佢想演內地製作人于正嘅新劇《神鵰俠侶》李莫愁一角，就諗盡辦法幫女友，自己仲投桃報李答應客串演楊康。點知有人過橋抽板，演到李莫愁之後，早排仲喺個朋友聚會上同霍建華撻着，於是日前同李晨攤牌分手，激到李晨即刻同于正講唔客串《神》劇！呢件事對李晨打擊好大，身在美國嘅佢前日凌晨喺微博留言：「飛鳥盡，良弓藏，狡兔死，走狗烹。」話俾人利用完就一腳踢走！到前晚7點佢再留言：「不願在異鄉流淚，誰能為我按一下快進……」

■李晨對張馨予用情好深，但佢點都估唔到拍拖年幾就俾對方飛咗。資料圖片

喊到眼腫

張馨予噚日凌晨喺微博放咗張喊到眼腫嘅相：「總有一天，你承受過的疼痛會有助於你。生活從來不會刻意虧欠誰。」之後兩個人互相取消關注，連網友都紛紛留言估佢哋係咪已經分手。

打畀張馨予，問佢係咪同李晨分手，佢冇否認，只話：「我現在忙拍戲，不方便講。」係咪搭上霍建華，佢就話：「到時候再說。」

緋聞多多嘅霍建華之前傳佢因為陳喬恩飛咗林心如，而陳喬恩就為佢撇咗古天樂，依家兩個人就用埋同一個經理人，冇諗到霍生咁快又傳出搭上張馨予。噚日打畀霍建華同喬恩經理人連俊杰求證，佢話：「一般藝人的事情，我不會過問。」問霍建華同張馨予點認識？佢話：「我也不知道他們怎麼認識的。」

■陳喬恩同古仔分手後，翻撻霍建華，諗唔到霍生咁快搭上張馨予。
資料圖片