張耀榮紀念演唱會8月底舉行 劉德華張學友容祖兒坐鎮

演唱會之父張耀榮生前為唔少歌手完成紅館夢,佢離開兩個多月後,骨灰已經安放喺荃灣西方寺,今日由佢生前有份創辦嘅演出業協會喺尖沙咀舉行記者,宣佈嚟緊8月30同31號,假紅館舉行兩場名為《演唱會之父榮耀紅館SHOW》。

協會中會員公司代表出席,而張生女兒張麗芳代表「耀榮娛樂」現身,大會喺記招台上放置一張椅,並由張麗芳同協會主席陳淑芬,放上一個寫上「RESERVED」(預留),眾人將公布兩日演出歌手名單,全是跟張生有密切關係歌手。當中包括張學友、劉德華、鄭秀文、容祖兒、許志安等人,而五月天、葉蒨文、甄妮、鄭欣宜、關菊英,更會連續兩晚演出,最後就放一杯紅酒喺椅上,再祝酒完成記招。

身穿黑色連身裙嘅張麗芳,與一眾會員代表接受訪問,東亞娛樂代表許冰心話:「今次門票會公開發售,票價係200至680元,所有收益扣除成本後,會將餘數,轉交張生生前最愛嘅太太同家人。」

佢亦表示張太獲悉協會有意為張生舉辦紀念演唱會,都認同及支持,因為想延續張生一貫畀演唱會娛樂大家嘅心願。許冰心又話歌手朋友們回覆反應都好快,今次亦係義務性質演出,演唱會流程仍編排緊,又話考慮喺台上為張生放一張椅。

問到張麗芳會否揀選張生生前愛聽嘅歌叫歌手演繹?佢話:「留畀歌手自己揀唱咩歌,可能歌手同Daddy生前有自己回憶,嗰一晚留畀佢哋講想講嘅同唱想唱嘅歌。」

張麗芳及陳淑芬放下「RESERVED」字牌在座位上。

演出歌手名單:(排名以筆劃序)

8月30日
五月天、吳雨霏、倫永亮、容祖兒、草蜢、側田、張學友、陳慧琳、陳潔靈、梁漢文、葉蒨文、甄妮、鄭秀文、鄭欣宜、關菊英、蘇永康、Mr.

8月31日
五月天、太極、李克勤、林子祥、莫文蔚、許志安、楊千嬅、葉蒨文、甄妮、鄭少秋、鄭欣宜、劉德華、鍾鎮濤、關淑怡、關菊英、譚詠麟、Maria Cordero(肥媽)、RubberBand