「振山漢子」命運各異 陳振聰踎監 陳山聰甩拖

大家仲記唔記得「振山漢子」呢個Big4組合呢?佢哋四個好風光o架,咁究竟「振山漢子」係邊位呢?就係網民冠以陳振聰﹑陳山聰﹑陳子聰同陳漢聰四個男人,佢四個嘅特點係姓「陳」個名又有個「聰」字,而最緊要係「唔使做又大把錢」。

當時外界曾戲言,陳姓嘅人應為兒子改名為陳「X」(唔係粗口,而係大家都姓陳,都係叫「陳乜聰」咁解),包保大富大貴咁話。而網民曾將梁漢文、蘇永康、許志安及張衞健咬住支玫瑰嘅相惡搞,Key咗「振山漢子」四個大男人嗰樣,變成「陳FOUR聰」,呢張圖仲被網民無限loop添﹗

不過今年「振山」先後「出事」,陳振聰因偽造及使用華懋已故主席龔如心遺囑,罪名成立,判監12年,法官指摘陳振聰貪婪﹑邪惡﹑無恥。

至於陳山聰都唔好得去邊,兩年前佢同何家千金何超雲撻着,兩人糖黐豆周遊列國,山聰好似唔使做咁嘆世界,可惜甜蜜日子只維持兩年,今年四月兩人分手,山聰箍煲失敗,與超雲兩年情玩完。甩拖後男方頓變「四失山聰」:失工作﹑失情人﹑失朋友﹑失形象。0依家山聰搬返去九龍灣寓所繼續「潛水」,鮮有露面。

「振山」衰咗,咁「漢子」又點呢?

本身為設計師嘅陳漢聰,係振山漢子四男中,最冇乜人認識一位,不過去年陳漢聰同「玩具大王」蔡志明女兒蔡加怡拉埋天窗後,被網民笑稱「一夜致富」;兩人結婚都將近一年,依然甜蜜溫馨。

最後就講到陳子聰啦,2003年同何鴻燊女兒何超儀,喺澳洲墨爾本舉行世紀婚禮,婚後兩公婆依然恩愛,不時結伴出席活動,而陳子聰婚前係fit爆男模身形,但婚後就走樣變成大肥佬,今年係佢哋結婚十周年,唔知會點慶祝呢?

「振山漢子」命運各異 陳振聰踎監 陳山聰甩拖
呢張圖真係要無限loop呀!


陳振聰判監12年。(資料圖片)

陳漢聰去年同蔡加怡結婚。(資料圖片)
陳漢聰去年同蔡加怡結婚。(資料圖片)

陳子聰同何超儀結婚十年,依然恩愛
陳子聰同何超儀結婚十年,依然恩愛。(資料圖片)

那些年弗爆的陳子聰
那些年弗爆的陳子聰。(資料圖片)

婚後陳子聰(中)身形發脹
婚後陳子聰(中)身形發脹。(資料圖片)


陳山聰今年同何超雲甩拖,變四失山聰。(資料圖片)