被指與黃宗澤（Bosco）譜出姊弟戀嘅楊崢，今日擔任金像獎記者會司儀，當記者恭喜兩人拍拖，楊崢笑晒口講多謝，問到佢哋係咪真係拍拖？楊崢就甜笑話：「係啦，互相了解，互相認識緊﹑了解緊。」係咪男方追求？楊崢話：「問返佢啦。」

對於有報道指佢哋戀情開始咗三個月？楊崢只講：「報道咁寫，實際互相了解，認識當中。」有網民聲稱目睹兩人於西貢拖手？楊崢就話：「正常社交活動。（拖手喎？）正常社交活動啫。」有冇Kiss？佢就避談：「係啦，希望大家畀啲空間我哋。」

問到點解避忌唔公開？係咪怕「小器」？佢只話：「多謝大家關心。」講到二人餵食曲奇好sweet？楊崢話：「一齊試食啫，（咁close？）食嘢梗係細細啖﹗」

係咪因食嘢而結情緣？楊崢表示：「我哋好多共同嗜好及興趣。」係咪去男方間Bar而撻着？佢話：「唔係（點撻着？）唔講咁多啦。」

楊崢大讚男方孝順及有上進心：「好欣賞佢勤力及謙虛。」至於識唔識男友舊愛胡杏兒？佢話：「知道係邊個。（杏兒知唔知你哋拍拖？）多謝咁多位，唔講咁多。」楊崢又話接受到姊弟戀，佢話最緊要溝通到。

記者會結束後，楊崢就自己駕車離開，佢嗰架仿古車係男友Bosco嘅，當佢駛出停車場見有記者守候，佢都好識做停低影相，問佢係咪返屋企，楊崢大方話：「冇街去呀，返屋企。」問到架車係咪Bosco？楊崢只係哈哈大笑幾聲，冇正面回應。

之後佢架車經紅隧駛往鯉景灣，再問佢拍拖開唔開心？楊崢甜笑話：「唔答啦。」係咪長期揸Bosco呢架車？佢都只係匆匆話唔係，就返咗屋企。

黃宗澤「蜜」認「崢澤戀」：而家好開心！

黃宗澤中午返回無綫開工，被問到與楊崢發展到什麼階段時？他說：「ok啦，你哋搞到我好尷尬！畀啲空間我哋。」他指與楊崢都喜歡下廚，但未有試過對方手勢，被問到什麼時候開始認為對方適合發展？他說：「早排啦…13…14年啦，14年啦。（去西貢？）行街啫！（十指緊扣？）正常社交活動！（同對方情侶檔搵真銀？）遲啲先講啦！」

他指未見過楊崢父母，亦沒有到對方家拜年。問到情人節送甚麼禮物，他尷尬表示未準備，皆因未知道當日要否開工，對於被指姊弟戀，他直指年齡差距絕對不是考慮因素，又強調自己不會閃婚。他又不忘大讚女方聰明兼EQ高！問到黃媽媽是否知道他的新戀情？他表示：「媽媽之前知，我哋係朋友介紹！（媽媽鐘意？）ok嘅。（好sweet？）而家好開心！」

談到楊崢出席金像獎活動時，被發現駕駛他至愛的古董車，他即指因楊崢的車正值維修，故才借給她駕駛，並謂：「咁我有多，嗰架少揸！」