「港視」再被判死刑，走投無路下只好停止製作新節目，「鄭太」蒙嘉慧（YoYo）孭飛的港視新劇《天網》當然受拖累！YoYo離開TVB剛一年，雄心壯志受創，老公仔鄭伊健當然心痛，忍不住代妻出頭，不平則鳴，「呢件事真係令人費解！」他更暗示有電視台無心做卻仍然生存，「有心人冇得做，冇心就要佢哋做，唔明點解搞成咁？」

鄭伊健，46歲中佬，在娛圈仍然有價有市，機會從來無停過，而去年轉投港視的「鄭太」就無咁好彩，家陣停工冇得撈，伊健都戥老婆好無奈，有感而發：「都唔知點講好，總之件事令人費解，明明唔係一個人嘅事，但就搞到咁複雜，仲講到同政治扯上關係，簡單嚟講，其實只係想香港多一個娛樂平台啫。多個行頭，多個競爭係好事。唉！我最擔心過咗去嘅訓練班同學，睇住我成長嘅幕後前輩同師兄，佢哋只係想實踐夢想，o依家有心人冇得做，冇心就要佢哋做，唔明點解搞成咁？唔使咁複雜喎……一言難盡啦。」因為牽涉到時事熱話，伊健身邊人害怕他談及敏感話題急叫停，伊健被迫自我河蟹，真陰功。

最型美食專員

在新片《盜馬記》中，伊健飾演活潑搞笑的「三流煙斗神探」張浩，用盡方法不停追捕「九尾狐」梁家輝，角色搞笑有別以往，加上去布拉格取景，輕輕鬆鬆似足去旅行。伊健自爆，老婆蒙嘉慧都有過來探班，他就成為劇組的「旅遊大使」，負責周圍去發掘優質餐廳，推介的扒房個個讚好。在港取景期間，伊健又向劇組力推食得健康的免油炸鍋，仲帶埋個鍋去煮，所以成組人都拍得好開心。

小朋友的疑惑

今次是伊健事隔20年再同影帝梁家輝交手，他說：「1994年我啱啱入行，佢（梁家輝）同我講話從事電影工作一定要有夢想，當時我目標係拍戲同置業，佢就話我一定買到樓。幾年後我終於買到樓，喺中環撞到家輝，佢話：『嗱，都話你可以買樓㗎啦！』今次家輝就建議我生仔，話：『你睇我同Kelly幾好，研究吓啦！』以前我會斬釘截鐵咁話一定唔會，o依家唔敢肯定，正如當日堅決話唔結婚都結咗啦，順其自然，一步步啦，暫時未有打算，因為社會壓力實在太大，個世界煙霧瀰漫，好複雜，唔想層壓式制度令到個小朋友唔舒服，冇晒童真同自己！而且我又唔係富裕到唔使工作，最怕有一日小朋友問我：『你冇時間陪我，我唔開心呀，你做乜要生我出嚟呀？』我真係唔識答佢，呢個問題，我係反覆思量過㗎。」

拍外星人電影

鄭伊健有心有力，就算50後做老竇都冇有怕，更拒絕接受人工授孕：「我又唔係唔得，使乜老婆人工授孕？年紀唔係問題，就算80歲結婚都冇問題一樣，如果畀我揀，我會揀生女。」問到乜都有的伊健有何夢想？他聲稱，待年紀大啲會圓導演夢：「心目中有個天馬行空嘅劇本，都係類似外星人去到現實世界，好似《來自星星的你》咁上下啦，但人選未度，反正都唔會咁快成事，至少50歲後嘅事，最怕做咗導演會傷腦筋到甩頭髮，個樣變得蒼老就唔靚仔啦！」

港視苦主動向

李雨陽 今年初已鋪定後路，聯同三位圈外朋友合資搞網上雞檔，出售一款叫「原味雞」的有機冰鮮雞。為減低成本更做埋送貨仔。

※黃澤鋒 轉營從商，籌備在西貢開咖啡店，見步行步。

※艾威 賣錶賣車賣樓套現外，還會一脫求生，下月將全裸拍攝新片《陰陽大酒店》。

※劉玉翠 轉戰內地掘金，除拍港台劇，亦有內地劇集邀約演出，酬金豐厚。