鄭世豪夢中夢 我係卡拉之星

早前在無綫節目《星夢傳奇》奪得第二名的鄭世豪,獲獎後星途一洗霉氣,工作量明顯增多,連曝光機會都相應提高,訪問當日選址在電視城內進行,再次踏入傳媒中心的一刻,鄭世豪直言感覺似發了一場夢,他稱從未想過有機會接受訪問,面對這突如其來的星運,他仍然很開心和陶醉。撰文:何慧斯

鄭世豪
■入行12年的鄭世豪,演藝事業邁進一大步。
攝影:陳俊強

鄭世豪
■隨着在《星夢傳奇》奪第二名,鄭世豪工作量及曝光機會大增。

自言仍在夢境中的鄭世豪,重臨電視城傳媒中心,感觸良多,他說:「以前喺錄影廠開工,成日望上嚟,都唔知呢度係點樣,直到《星夢》記招先第一次上嚟,o依家仲好似係一個夢,有啲嘢係一世人唔係可以預料到嘅事,好似做專訪,以前只係喺側邊望住啲同事,睇吓人哋做訪問究竟係點,有時會諗幾時先輪到我,點都冇諗過有呢個機會突然間咁快出現。我嘅心情仍然好開心,好陶醉喺呢個突如其來嘅世界。」

鄭世豪
■鄭世豪償願讓父母親到現場欣賞其演出,總算有個交代。

憑第17期藝訓班入行的鄭世豪,不經不覺已入行12年,同期同學包括黃嘉樂、李霖恩、何綺雲和羅天池,當中有部份已轉做配音,運道不濟,難免會有所失落,他笑說:「唔知呀,可能我入行嗰陣已經22歲,好快覺悟同蘇醒,知道自己唔會做到主角,好多嘢量力而為,我知自己喺呢間公司嘅功用,所以咪向住呢個功用發展,希望做到最好,你問我有冇心灰想放棄?做咗十幾年,一定會有呢啲念頭,有時都會問點解又係做呢啲?又係企喺後面冇對白嘅?不過好快又會俾突如其來嘅事影響,好似收到有一版紙對白嘅劇,已經好開心,原來我喺呢間公司仲有生存價值,成個人又醒番晒,將呢個放棄念頭消除,跟住反而期望有人睇到今次演出,下次帶嚟三版紙對白嘅演出機會。」

鄭世豪
■鄭世豪常演一些沒對白的角色,他坦言曾灰心得想放棄。
《耀舞長安》劇照

事業拾級而上

熱愛唱歌的世豪,今次在《星夢傳奇》奪第二名,演藝事業的確邁進一大步,世豪說:「將來條路對我嚟講好漫長,我冇怨自己起步慢,亦唔敢話每年有乜嘢大躍進,你問我會話係一層一層咁進步,只不過係人哋搭電梯,我只係行樓梯。呢個階段代表可以搭䢂上咗一層。」他續說:「呢12年只係我人生嘅一部份,我覺得可以做到六、七十歲,所以不如攤長嚟嘆吓人生。」

記得世豪在《星夢》的舞台上曾經說過,很希望家中兩老可以在現場欣賞他演出,追問當中原因,他說:「到底拍劇多年,未有一個角色跑出,或者令到人對我印象深刻啲,知道呢個人叫鄭世豪。反而做綜藝節目,當你走出嚟嗰陣,螢光幕點都會key一key你個名,我咁多年冇玩過任何遊戲、綜藝節目,呢一次佢哋可以喺一廠睇到自己個仔喺台上演出,我好想唱歌畀佢哋兩個人聽,可惜第一晚初賽撞正打風,變咗喺五強嗰晚先可以成事,成件事對我嚟講好足夠,最後結果唔係預期咁,但對佢哋係一個好好嘅交代。」

發揮淋漓盡致

目前與無綫仍是藝員合約的世豪,在工作方面暫時仍是一腳踢自己做:「有請教啲前輩,佢哋都畀咗好多意見我,我覺得人哋去搵你做嘢,唔同工種都要搵食,凡事要以誠相對,最緊要大家開心,當然困難一定會有,長遠計有一個人幫手,但係我好享受呢一刻,感覺好似突然間畀一場好有發揮嘅戲我做,亦都係一種回報同推動力。」重提當日在微博炮轟《星夢》入圍的準則不公,世豪說:「目的只係交代畀一啲支持我嘅朋友,唔好期望我有機會上到去,唔覺得自己係公眾人物,唔會上到報紙,所以嗰件事冇諗過寫完會有人報道。」

服裝提供:CUBIC

我係卡拉之星

鄭世豪
■過去十年鄭世豪都有參與《東華》卡拉之星。

雖然世豪入行以來曾參與很多戲劇演出,不過印象最深的,莫過於每年均有支持《歡樂滿東華》的卡拉之星環節,問到他會否因《星夢》而放棄參加卡拉之星?他坦言:「我會繼續唱,參加卡拉之星唔係要衡量因為o依家有人認識鄭世豪,所以唔去唱,我反而覺得係卡拉之星畀咗好多嘢我,我唱咗十年,呢個真係好開心嘅一件事,亦係一個踏台板機會,我梗係想繼續自己嘅生存方式,做好每件事,唔想因為多咗人識鄭世豪,將咁多年嘅宗旨改變咗。如果冇卡拉之星,就冇人知我鍾意唱歌,亦唔會有人搵我做唱歌活動。」