《星夢傳奇》亞軍鄭世豪電台受訪 揚言想出唱片

《星夢傳奇》奪得亞軍嘅鄭世豪,首次踏足新城接受訪問,世豪心情仍然興奮,佢話呢幾日經歷好多入行以來第一次,包括受訪、專訪等,問到仲覺唔覺得公司係造馬?佢避談話:「真係好開心,有呢個結果好開心。」

起初以為無緣參加比賽,就返去大陸拍劇,期間突然收到通知可以參加,心情興奮,繼而就諗要唱邊首歌。

雖然得到亞軍,但未有增加任何工作量,世豪仍然心滿意足話:「仍然係興奮中,個個師傅都有恭喜我。」

對於有網民指佢擊倒鄭俊弘(Fred),佢話:「完全唔敢想,睇到阿Fred有今日成績,係一份兄弟情,冇諗過可以同佢一齊企喺台上睇住成績,當時我都預咗自己有第二,亦預佢會係冠軍。」世豪形容自己心情係好似十幾年嘅努力,等住爆發出嚟一樣。

講到若果可以早點參賽,會否有信心得到更多觀眾支持拉近票數,甚至最後勝出?佢話:「冇諗過,已經係發生咗嘅事,呢刻係好好享受,發生咗嘅嘢唔再諗。」

若果公司成立唱片部,佢都好想有機會簽唱片約,佢仲透露原來早前曾經諗過自資出碟,一圓自己出碟夢。

鄭世豪電台受訪超興奮
鄭世豪首次去新城受訪,感覺超興奮。