最近有傳31歲的鍾嘉欣為保事業而狠撇拍拖8年的伍允龍,消息一出,鍾嘉欣即獲唱片公司高層、一向對鍾嘉欣愛護有加的何哲圖放生,月初已完成為新劇《武則天》錄插曲,之後又有新歌錄音,週日(26日)亦已起程往內地拍新劇《哪吒》,睇嚟事業和愛情,真係只可以揀一樣咋喎!
04年參加「國際華裔小姐」獲得冠軍而加入娛樂圈的鍾嘉欣,多年來純情乖乖女形象多仔冧,亦深得廣告商和監製愛用,一年拍 4劇和 6個廣告絕對是等閒事。
07年鍾嘉欣被爆秘撻伍允龍,晚飯後伍允龍仲上埋嘉欣屋企短聚添!
13年底嘉欣喺九展開個唱,伍允龍不但高調捧場,仲放相上微博,戀情一度浮面!網上圖片
嘉欣以前唔識煮飯,但家人始終唔喺身邊,自己都要識照顧自己,喺嘉欣微博經常搵到佢嘅私房菜圖,但 2碗飯,唔知煮埋畀邊個食呢?網上圖片
「 Ready嘅時候會高調」
入行11年,剛踏入31歲的鍾嘉欣有新劇《華麗轉身》推出,據知嘉欣去年9月接拍此劇前,有傳她歷年來與視后無緣心淡,故情願放假陪家人。
「嘉欣入行都10年,之前試過一年拍6套劇,實在負荷太重,14年嘉欣都拍咗3套,係時間要休息吓。」鍾嘉欣在休息期間,大多時間留在溫哥華與家人團聚,其餘時間則選擇在港接簡單的公開活動或廣告代言。入行多年,雖然嘉欣形象保持到,但公司始終不願她承認與伍允龍的戀情,去年底便曾企圖捧打鴛鴦。
據知曾經在微博表示要支持男友有份主演的電影,和出席首映禮等,以上舉動完全觸怒無綫高層、一向對她愛護有加的和星夢娛樂老闆何哲圖,據知公司不滿伍允龍零知名度,而隨住聽教聽話的吳若希加盟星夢娛樂後,嘉欣隨即被打入冷宮,前年於九展舉行完個人演唱會後,歌唱事業一直未再有進展。
21/4 邊行邊笑
上週二( 21日)嘉欣去完宣傳新劇《華麗轉身》後即急急腳坐的士返將軍澳寓所,全程笑笑口咁,心情睇嚟唔錯。
去年 4月嘉欣的生日會上,全部無綫人,而伍允龍企正嘉欣後面,名正言順做嘉欣背後嘅男人。網上圖片
休息咗大半年,難得出席活動見到咁多 fans,嘉欣趕都唔走,係都要同班 fans影晒相至肯離開。
新寵吳若希 踢走嘉欣BB
鍾嘉欣 08年已加入星娛樂(現改組為星夢娛樂),有揸 fit人何哲圖陪出陪入。曾經出過 3隻大碟加 1張精選碟嘅嘉欣,當年都受過唔少何哲圖恩惠。
但隨住吳若希 10年加入,年輕、聽話自然得寵,何哲圖即搵其無綫高層老婆余詠珊幫手,安排吳若希拍劇、做主持,待遇似足當年嘉欣咁得寵期。
已多次收到公司投訴的嘉欣,始終要向現實低頭,於本年初,二人決定轉行地下情。「篇報導寫到嘉欣為咗事業而放棄男友,其實嘉欣份人好專一,都當正 Philip係結婚對象,佢(嘉欣)話過,拍得拖就預咗結婚,佢哋兩個有時都會有小爭執,不過佢哋處理手法都好成熟,而且佢哋一向都好 sweet,未聽過話冷戰之類。」
早前有人刻意放風,指嘉欣和伍允龍已經分手,果然工作馬上接踵而來,嘉欣即接獲星夢安排錄新歌,並已計劃出新碟,又有《武則天》插曲唱,而無綫亦馬上安排她往杭州3個月,拍住王祖藍拍內地劇《哪吒》,之後亦會拍住老拍檔黃宗澤拍另一套時裝劇。
嘉欣出名眼淺,一個女仔離鄉別井,見親父母都喊到收唔到聲!電視圖片
4年搏視后
無綫花旦買少見少,已上一線的嘉欣曾經有望攞視后,可惜最終只係擦身而過。如今嘉欣決意先將感情再低調,在多個訪問中,嘉欣都提到希望 35歲前結婚兼生 B,其實自 07年鍾嘉欣和伍允龍拍拖首次斷正,嘉欣已不止一次公開講伍允龍,「我哋低調嘛, READY嘅時候會高調!」、「我同佢(伍允龍)私底下嘅關係唔錯,佢係一個可以講到好多心底話嘅人,佢係一個好好嘅人,亦係一個信得過嘅男人。」仲有四年時間,努力!
浮浮沉沉
鍾嘉欣和伍允龍 07年開始拍拖,轉眼間已經 8年,本應好哋哋間中公開 sweet吓,可惜敵唔過公司壓力,o依家轉行地下情。辛苦晒!
07年
鍾嘉欣和伍允龍首次被影到拍拖晚飯,最後伍允龍仲送埋自己上嘉欣屋企添!
13年
8月鍾嘉欣首次開個唱,伍允龍親自到場支持,完騷後喺化妝間同女友合照即晚放上微博宣示主權,終於 man返次!
14年
伍允龍新戲《惡戰》上映,鍾嘉欣喺微博 po海報和戲飛以示支持,仲話好可惜去唔到首映添!
15年
已協議轉行地下情,兩人微博已經再唔提得對方,從此伍允龍微博就只得返「男人與狗」!
嘉欣BB 未輸晒
84年出世嘅嘉欣 BB,雖然今年已經 31歲,不過夠純情形象討好,基本上係無咩人會討厭佢。可惜一個情字,令嘉欣進退失據,亦令吳若希有機可乘,除咗年齡,係絕對有四大優勢贏吳若希!
贏 名氣
唔使多講, 04年國際華裔小姐冠軍呢個名,已經贏晒吳若希近年攞過嘅獎項啦!
贏 學歷
嘉欣 BB喺加拿大 UBC(英屬哥倫比亞大學)讀兒童教育系二年級,雖然因為參選華姐而最終無畢業,但係相比起中五都未畢業嘅吳若希嚟講,已經贏咗幾條街先啦!
贏 廚藝
一個人隻身由溫哥華嚟香港生活,多年來嘉欣 BB已經學識煮飯仔!早排佢至話可以煮到 6餸一湯喇!唔知吳若希又識唔識煮公仔麵呢?
贏 純情
大家都知,嘉欣 BB出道咁多年,數嚟數去都係得林峰、陳展鵬同埋伍允龍呢幾個緋聞男友,但係睇返吳若希本數簿,真係厚到唔知邊頁開始睇先啱?!