鍾嘉欣生仔緊要過攞視后 欣賞談男友伍允龍

鍾嘉欣繼《大藥坊》後,再被安排劇接劇,在剛播出的《飛虎II》中擔正女主角,嘉欣細訴對奪視后的想法、合約年期,甚至大方談及欣賞男友伍允龍的地方!

鄭:鄭紹康 鍾:鍾嘉欣

(鄭紹康,有名「天下第一關」,知名公關公司天機掌舵人,亞洲女首富何超瓊愛將,富豪名人天王天後知心閨密。)

鍾嘉欣:生仔緊要過攞視后

鄭:你入行十年都好順利吖!唱片又賣得好!
鍾:算順利,但有時外在嘅成功、快樂、風光,但喺背後,可能情緒上或者人與人之間嘅關係上,都會有一啲碰撞或者跌低嘅時候。

鄭:屋企人有冇話你入行後變咗?
鍾:佢哋覺得我冇,覺得我成熟咗,好開心我識照顧自己,但仲有童真,每次我一返到去溫哥華,我又變番要佢哋保護嘅小女孩,但當佢哋嚟香港探我,又見到長大咗、有責任感嘅我,佢哋話選美時已經睇到呢樣嘢,話我台上嘅表現同台下係兩回事,可能我註定係食呢行飯。

鄭:就快又台慶,睇到你近年作品由四部減少到兩部,原因係咩?
鍾:呢兩年係,我覺得係好事。開頭冇人識,新又平,人人好奇我係邊個,同埋我亦都好聽話、冇是非,佢哋可能會覺得唔麻煩,所以有好多工作、好多產。但做做吓,都係求質素多過數量,所以慢慢係少咗嘅,我多咗時間做功課,可以做得好啲!

鄭:點睇視后?
鍾:希望有日可以攞到。其實我對獎項唔係好重視,當然我想得到認同,但最重要係我喺劇帶出嘅訊息,就算只係幫到一個人,我已經覺得好幸運。

鄭:有冇預計幾時攞視后?
鍾:我本來想三十歲之前,但今年已經三十歲,我想三十歲生仔㖭,發覺原來人生冇得計劃得咁犀利,所以我一直性格都好隨緣,唔好變咗個咁有計劃嘅人,有乜機會,再去做到最好就OK。

鄭:咁多藝人離開TVB外闖,你有冇咁嘅打算?
鍾:我要睇吓我到三十三歲係點樣,因為我份約去到三十三歲,我想睇吓到時我係做緊啲乜嘢。

鄭:有冇諗過返大陸賺人仔?
鍾:我能夠踏出去香港,已經係跨過咗我嘅一個底線,如果我要再跳出去大陸,再適應一個新嘅地方,對我嚟講係一種打擊,我要睇吓我想唔想受到新嘅打擊,當然有人仔搵梗係好,但係我亦都要睇自己身體同能力,同埋到最終我覺得我係會結婚生仔。

鄭:點睇黃翠如、洪永成、陸浩明等等有線電視藝人加盟?
鍾:其實我覺得唔應該咁分,咁我係咪屬於溫哥華人?高層眼光咁好、咁有經驗,一定係睇到佢哋內在有啲嘢、有特質,所以揀佢哋。

鄭:你睇好邊個新一代可以晉身一線?
鍾:我睇好翠如BB,覺得佢好有potential,同埋我覺得佢好有想法,好似好真,好鍾意呢種感覺,男仔就冇乜點留意。

愛伍允龍有上進心

鄭:婚後你仲做唔做呢行?
鍾:我都會做,我會想好似蔡少芬姐姐、我偶像Kelly姐姐(陳慧琳),keep住出嚟做少少嘢,我覺得好開心。我覺得一個健康嘅家庭,雙親都要有自顧嘅能力,小朋友至會覺得佢哋都好努力工作,role model嘅concept會更強。

鄭:你家庭心都幾重!
鍾:我好重㗎,但我唔知我會唔會有呢個福氣。

鄭:一定會!你會唔會閃婚?
鍾:唔會閃婚,會傾嘅。

鄭:咁多年都冇影過你夜蒲媾仔。
鍾:我冇夜蒲過,我唔識媾仔,我未媾過仔,酒我一滴都冇飲過。

鄭:係咪唔講得感情狀況?
鍾:唔係唔講得,而係我鍾意低調,咁處理我係最舒服嘅。

鄭:對方又好好喎,冇去借你知名度……
鍾:唔會啦,我識得嘅人,喺我生命中嘅人,都係真心愛我嘅,我可以話未試過俾人hurt。

鄭:伍允龍係邊個經理人㗎?我想幫吓佢。我同安志傑都熟,我知佢哋成日一齊打機。
鍾:係呀,同埋(謝)霆鋒,三個一齊打機。其實我覺得佢係爭個機會。

鄭:不如你講講你鍾意伍允龍啲咩?佢有咩優點?
鍾:佢係一個好識照顧人嘅人,佢係一個好正義同好可靠嘅人,我覺得可靠同誠實,喺呢行係好難搵。有上進心但唔係野心。

鄭:你哋喺屋企有冇玩吓煮飯仔?
鍾:好似講多咗,我識煮拉麵加蛋,最拿手煲湯。爹哋好鍾意飲我煲嘅湯,每次飲直頭甜到漏曬,同埋好似眼濕濕。爹哋食我整啲飯都好開心,但佢會話「阿女,唔好煮嘞,阿媽煮啦!」因為我仲未拿捏得好,我整蝦仁炒蛋、矮瓜魚餅,可能有啲太熟、有啲又太生,但佢哋鼓勵我要學嘅。

鄭:有冇結婚計劃?
鍾:我覺得要喺有能力生BB嘅年齡。其實依家三十歲已經遲,但我喺工作上團火又未熄。如果有呢個階段,我覺得係三十三、三十四歲,而且要即時生小朋友,一結完婚,第二日度蜜月要即時有,如果能力可以,我想生四個,當然睇自己歲數,我唔會想超過四十歲生囉!

鄭:圈中好朋友有邊幾個?
鍾:好多喎,馬仔(馬浚偉)、李亞男、(黎)諾懿、(王)君馨、李思欣啦,全部都可以講心事!

鄭:你係點keep fit?
鍾:其實我係幾好彩嘅,因為我爸爸媽媽本身個figure係slim嘅,所以我落嘅功夫可以比其他人少,但依家我都有跑步,同埋呢個月開始做太極,愈大愈注重身體,我覺得太極或者氣功,可以活動到身體裏面嘅器官,令到再健壯啲。

鍾嘉欣:生仔緊要過攞視后

最佳女主角

鍾嘉欣是如假包換的BB,年前邀請她出席活動,刻意安排另一嘉賓是大家談論了很多年,二人樣貌相似的「男版嘉欣」吳尊。活動前一晚致電嘉欣,她說很期待這第一次見面,興奮得睡不著,又想了不少開場白,跟吳尊打開話題。台慶頒獎禮很快便舉行,大家猜想嘉欣能否成視后,我不斷告訴嘉欣,她有觀眾緣兼唱片銷量是電視台一姐中最賣得,台前幕後和私底下都有一顆美麗的心,早已是大家心目中的最佳女主角。