32歲鍾嘉欣跟武打奀星伍允龍拍拖八年，其間先後跟拍檔陳展鵬及有米教友彭紀諺傳緋聞，但她最後選擇留守男友身邊。年前，伍允龍終於有機會擔正做電影男一，以為守得雲開的鍾嘉欣興奮過度，肆意高調感情事，隨即被大台雪藏。事業有阻滯，伍允龍男一路亦無以為繼，今年二月，鍾嘉欣終於向撈極唔起的伍允龍提出分手，死心結束八年情。

去年 10月，伍允龍第二部孭重飛的電影首映，鍾嘉欣亦有撐場。

保密協議

據了解，二月初被鍾嘉欣主動飛甩的伍允龍，跟前度早有協議，雙方都不會向外宣布分手一事。但上月底出席活動，鍾嘉欣被問會否為男友下廚時，以「我冇男友，只有朋友」暗示已回復單身。
「二月中祖藍同亞男結婚，佢哋都有去，不過當時已經分開咗，所以喺入面完全冇傾偈。」鍾嘉欣身邊人透露。
女尊男卑，出道未幾就被大台力捧的鍾嘉欣，跟做武術指導出身的伍允龍於○七年拍電影《十分愛》撻着，但二人一直低調，直至伍允龍有機會做電影男主角，鍾嘉欣才以女友身份，在微博公開力推對方擔演的新戲。

鍾嘉欣早前出席影視博覽，跟合作過的胡杏兒相遇，二人大講心事，之後杏兒亦在 Instagram留言，叫她「要開心」。

回復單身後，鍾嘉欣獲解凍，由 Johnny Yim監製錄新歌。

擺埋一邊

「開始拍拖，嘉欣屋企人已經好反對，公司高層亦有詐型，話佢會被 Philip（伍允龍）拖累，咁多年來兩個人都好有壓力。前年嘉欣（一三年底）開演唱會，冇知會公司就叫 Philip去捧場， Herman（唱片部揸弗人何哲圖）好唔高興，之後就話嘉欣生肖唔夾馬年唔同佢出唱片。舊年十月，嘉欣又突然走去睇 Philip做男主角嘅《天師鬥殭屍》， Herman嬲多二錢，咪夾埋佢老婆（余詠珊），搞到嘉欣連《巨輪2》都係得客串戲份，到而家都只係接咗部同黃宗澤拍檔嘅新劇。」
因為伍允龍被擺埋一邊，和大台仍有多年合約的鍾嘉欣，亦不得不為自己前途着想。
「最近一年，佢兩個嘅事業都好麻麻，心情唔好好易嘈交，嘉欣脾氣亦變得愈來愈差，好似之前 Philip搞生日 party，有個女仔貪玩，搽咗啲蛋糕 cream喺 Philip塊面咁小事，嘉欣都即時黑面發脾氣，搞到大家都好尷尬；加上佢覺得自己年紀唔細，要等 Philip事業有起色唔知等到幾時，加加埋埋令佢覺得再一齊都係冇結果，所以提出分手。」知情者說。

二月藍男結婚，身為基督徒的鍾嘉欣及伍允龍都有被邀請，不過二人在場內未有打招呼。


3月底跟徐子珊出席皮草活動，被問到會否為男友下廚，她暗示已經甩拖。

甩拖後，伍允龍經常黐住安子杰一啤食飯，近日更感謝朋友這段時間給予支持。

伍允龍是謝霆鋒的詠春師傅，而霆鋒私下亦稱鍾嘉欣為師母。

伍允龍去年 9月生日，鍾嘉欣抱狗到賀，當日壽星仔玩到一面 cream。

飲醉爆喊

八年情玩完後，據了解，何哲圖立即開綠燈，安排鍾嘉欣埋位錄新歌出碟。
至於曾經力挽狂瀾依然箍煲失敗的伍允龍，幾乎日日搵住老死安志杰和 Jesscia C，做電燈膽三人行。有指早前他出席演藝人協會聚會時，因心情差飲醉爆喊。
「 Philip一向好克制，嗰晚乜酒都飲，仲要杯杯清，之後仲喊到收唔到聲，但大家問極佢都唔肯講。」一名幕後人說。
致電伍允龍求證跟鍾嘉欣已分手一事，他說：「呢啲嘢唔回應住。（要等埋嘉欣一齊公布？）你咁夜打嚟（晚上十一點）我唔方便講。」翌日，伍允龍搵經理人擋駕，誓守他與鍾嘉欣保密分手的協議。

13年底，鍾嘉欣開個唱，陳慧琳做特別嘉賓，她在台上開心喊爆。

有指唱片部揸弗人 Herman對鍾嘉欣十分愛錫，但跟伍允龍戀情浮面後，即被送入雪櫃。

伍允龍第一部擔正的《惡戰》，跟安子杰打到飛起，不過未因而一戲成名。

當晚伍允龍亦出現為女友打氣，是二人拍拖多年來，首次以男友身份公開撐場。

鍾嘉欣在電視劇《巨輪》做女一，由於唔聽話，即將開拍的續集已被降做「客串」，冇得孭正。

多人追

嘉欣BB雖然不乏追求者，但她擇偶從不向錢看，有情寧願飲水飽。入行多年，只有伍允龍打動玉女芳心。

林峯
06年與林峯合作電視劇《溏心風暴》兼合唱片尾曲《心領》，有指男方對嘉欣 BB不停發功，管接管送，緋聞傳足兩年才停止。

伍允龍
07年，嘉欣 BB與伍允龍合作電影《十分愛》，因同是外國長大鬼聲鬼氣，一撻即着。

李傲寰（ Felix）
11年，鍾嘉欣與在加拿大讀書時的舊同學李傲寰（ Felix）約食飯被撞個正着，有指當時二人秘密拍拖， Felix又被踢爆有個拍拖多年的女友 Joyce。

彭紀諺
13年，王祖藍有心做媒，介紹屋企有米的教友彭紀諺給嘉欣 BB認識。

陳展鵬
14年，與陳展鵬連續合作《巨輪》及《大藥坊》成為熒幕情侶，傳出戲假情真。