早前同家姐周小君舉行完音樂會嘅音樂人周啟生，被警方拘捕！事緣今日凌晨時份，周啟生位於跑馬地成和道寓所，有鄰居見周啟生年約13歲囝囝徘徊，全身污糟，兼且周圍按人哋門鐘，鄰居見狀後擔心男童有意外，並懷疑男童被獨留在家，於是報警，警方到場後帶男童上樓，周啟生之後亦返回上址。

經警方在場調查後，周啟生囝囝被送院檢查，而周啟生則被帶返警署協助調查，最後以涉嫌「對所看管兒童或少年人虐待或忽略」被捕，案件由灣仔警區刑事調查隊第九隊跟進。經調查後，周啟生獲准以1,000元保釋外出，一個月後需返警署報到。

周啟生涉獨留囝囝在家，被警方拘捕。

周啟生回應時，表示兒子無恙，暫不回應事件，會於本星期三作出交代。周啟生是顧嘉煇的徒弟，既是歌手亦是音樂創作人，其父親是著名喜劇演員周吉。

鄰居爆周啟生凌晨打鼓 囝囝半夜跑樓梯

周啟生疑獨留13歲兒子周爵喺跑馬地成和道寓所，今日凌晨被警方以涉嫌「對所看管兒童或少年人虐待或忽略」拘捕，事後以1,000元保釋候查，一個月後需返警署報到。

據周啟生鄰居孫女士電話投訴，佢指責周啟生疏忽照顧周爵，孫女士話：「小朋友（周爵）成日半夜樓梯跑，一個人落樓冇人照顧，平日只有菲傭湊返學，夜晚只有小朋友喺屋企，一年前小朋友喺單位內狂叫45分鐘滋擾鄰居，我哋曾經報警，差人嚟到周啟生啱啱返，佢即刻衝返屋企扮冇人唔開門，不了了之。」

孫女士又爆周啟生經常飲醉酒同喺凌晨打鼓，甚至將紅酒樽同飯盒放喺鄰居門外；孫女士指周啟生同現任太太及囡囡出埠，獨留周爵喺屋企冇人照顧，佢已經連續幾晚見到周爵半夜落街跑。孫女士話有街坊見到小朋友半夜落樓，佢冇大廈門匙，只係用紙皮攝住個鐵閘，喺街又跑又叫。

周啟生13歲兒子周爵被鄰居揭發佢經常獨留在家。