洪天明與周家蔚拍拖後屢傳婚訊，不過最近有傳他們因吵大鑊而分手，情海翻波！對此，天明表示沒有回應，而家蔚則似有所指說：「唔知邊個煽風點火！」

洪天明與周家蔚是幕前公認的一對，早前二人還穿上婚紗禮服出席公開活動，被問到婚期時，天明指暫時想搞生意、專注事業；而家蔚則表示天明要過母親的那關，先成為基督徒。不過，最近傳出他倆吵大鑊分手，記者就此事致電身在上海拍劇的天明，他表示沒有回應，認為沒有其他人比他們更清楚當中事。至於家蔚則在言語間表示男未婚、女未嫁，感情的事很難說，並說：「唔知邊個煽風點火！」

記：記者　周：周家蔚

記：同天明係咪分手？

周：係咩？邊個講呀？

記：你哋係咪嗌大交分手？

周：冇乜特別，其實個個都會嗌交o架啦！

記：咁係咪分手？

周：邊個講？唔知邊個煽風點火，或者有人鍾意佢咪專登咁講，如果係女仔講嘅就想同佢一齊，如果係男仔嘅就想同我一齊囉！不過我好專一，呢啲分得好清楚。

記：你意思係咪有人想拆散你哋？

周：有乜話點……男未婚、女未嫁，都有可能，唔好話拆散，感情呢啲嘢好難講！

「除非佢有另一個」

記：你哋兩個依家係乜嘢關係？係咪男女朋友？

周：係！我哋日日都有通電話。

記：即係冇嘢啦！

周：佢依家自己喺上海拍劇，除非佢有另一個啦！

記：你哋感情係咪好穩定？

周：OK o架！不過男未婚、女未嫁，一日未結婚一日都唔知，我自己爹哋、媽咪嘅婚姻都唔係咁好，自己呢方面會有唔同睇法。

記：你媽咪話要天明做基督徒先畀你哋結婚，過咗媽咪嗰關未？

揀老公要好謹慎

周：未！佢有返教會，但未真係信，依家佢都好忙。

記：會唔會咁樣令天明壓力大？

周：男仔有壓力係啱嘅！當一頭家就係要有壓力！

記：係咪愛你就要承擔呢啲？

周：係呀！

記：係咪你一直想結婚但係天明唔想結住？

周：唔係！我唔恨嫁，不嬲都有婚姻恐懼症，自己要好清楚先會結婚，我鍾意小朋友，結婚後都會生小朋友，要同小朋友搵爹哋喎！所以要好謹慎，結咗婚嘅男人可以好容易變第二個人o架！

記：記者　洪：洪天明

記：你同家蔚分咗手?

洪：冇嘢呀！

記：你哋係咪吵大鑊?

洪：邊個話o架？我哋兩個嘅嘢邊個會清楚得過我哋，我依家喺內地拍劇，總之冇回應啦！

早前洪天明與周家蔚穿上婚紗禮服出席活動，儼如預演婚禮，笑到見牙唔見眼，想不到突然傳出分手！(資料圖片)

周家蔚不諱言感情事很難講，一日未結婚，一日都有變數！(資料圖片)

周家蔚（左）與好友早前到馬爾代夫玩，還在水中Kiss。

SoSo姐金句:拍拖拗撬多， 有人撥行火！

真假女友一籮籮

洪天明生得高大威猛，難怪入行以來緋聞不絕，異性緣十足！

徐子淇

00年，天明與徐子淇拍攝劇集《新鮮人》傳緋聞，多次拍拖斷正，但始終沒有承認關係，兩年後子淇承認分手。

楊　怡

03年，天明與楊怡的緋聞傳得熱烘烘，楊怡澄清只是好兄弟，可以搭住膊頭出街。

梁郁霖

06年底，天明承認與模梁郁霖（Lillian）拍拖，並表示拍拖幾個月雙方已見家長。

貝安琪

07年，天明與模特兒貝安琪在夜店又攬又錫，貝安琪強調是好朋友，不會有火花。

周家蔚

08年，天明與港姐周家蔚傳緋聞，家蔚對天明的花弗形象有另一番睇法，大讚他孝順開朗，最後承認拍拖！

恨嫁恨出口戴婚戒止癮

洪天明與周家蔚拍拖多年，一向甜蜜，有傳女方一直恨嫁，更不時在微博流露一顆恨嫁的心！即將為好友婚禮擔任姊妹的家蔚，日前到婚紗店試裙，字裏行間暗示恨嫁：「今年第二條，十二月到韓國也有一條，下一年不知要穿多少條！」及後她趁機試戴準新娘的巨型婚戒，可見其恨嫁心早露端倪！

兩年情「婚分中」等結局

洪天明與周家蔚的戀情於08年曝光，拍拖兩年多感情穩定，先後傳出婚訊及「分」訊。

08年4月　有傳天明與周家蔚拍旅遊特輯撻着，令天明與前女友梁郁霖分手，周家蔚澄清非第三者。

08年8月　天明與周家蔚現身澳門睇籃球賽，甜蜜咬耳仔，戀情浮面。

08年10月　周家蔚被踢爆與「未來老爺」洪金寶飯敍。

09年3月　二人屢傳婚訊，周家蔚被拍到睇婚紗，事後澄清是朋友結婚。

10年8月　周家蔚生日，天明在微博作愛的宣言，稱無論如何都會在她身邊。

10年9月　二人以情侶檔出席活動，周家蔚稱母親望她嫁個基督徒，又透露天明開始返教會，為結婚做準備。

10年10月　有傳二人感情亮起紅燈。

洪金寶封嘴撐「新抱仔」

周家蔚與洪天明相戀多時，天明父親洪金寶不時在公開場合唱好，大讚家蔚乖女之餘，還表明想飲新抱茶及抱孫，雖然天明與家蔚還未到正式談婚論嫁的階段，但顯然已成功踏入洪家家門，在未來老爺心中佔一席位！

對於近日有傳天明與家蔚鬧分手，即使兩人已作出否認，但洪金寶昨日卻不欲多加意見，實行以行動支持他們：「唔知邊度傳嚟，我又冇聽到，咩都唔知點講呢？（想唔想佢兩個快啲結婚，減少呢啲是非？）等啲後生仔自己發展落去啦！」