趙頌茹（阿Yu）狠撇老公周永恒（Roy），決定離婚爭回兩個囡囡嘅撫養權，前日係大女信希4歲生日，點知Roy噚晚上阿Yu位於屯門嘅屋企大吵大鬧，嚇到阿Yu報警求助，警察持盾牌上門，約晚上9點半將Roy帶返警署，上警車前Roy重複兩次大叫：「個女生日，老婆都唔俾我見，仲報警，超開心。」曾打老婆被控傷人判守行為18個月嘅Roy，據知，佢今次就冇暴力行為，只係口角。

■周永恒（中）噚晚上阿Yu屋企搞事，結果被差人持盾牌帶返警署。

阿Yu：我會賺錢湊大兩個女

趙頌茹（阿Yu）狠撇人渣老公周永恒（Roy），決定離婚爭回兩個囡囡嘅撫養權，前日有讀者提供三母女到迪士尼睇巡遊嘅相片，因家暴同老公出軌瘦到變骷髏人嘅阿Yu，着短褲露出一對香雞腳，雙手亦骨瘦如柴，睇嚟體重仍未回升。

■前日讀者影到阿Yu帶兩女到迪士尼玩，原來呢日係大女信希4歲生日。

帶囡囡迪士尼慶祝

至於Roy公開咗阿Yu三條聲帶後又玩失蹤，近日仲刪除晒所有facebook，唔知佢搞邊科！另有雜誌話Roy玩厭咗小三劉依靜（Ruby），搞到Ruby發爛渣遷怒阿Yu，周圍叫人唔好搵阿Yu做嘢。打電話畀阿Yu，佢話：「前日係大女信希4歲生日，所以帶咗兩個囡囡去迪士尼慶祝，玩得好開心。」

問到心情係咪好番啲？阿Yu話：「OK呀，大家唔使擔心。」對於傳Roy同小三分手，阿Yu好冷淡咁話：「我同佢冇聯絡，乜都唔知。」至於傳Ruby叫人唔好搵阿Yu做嘢，阿Yu話：「唔知道，自己做好自己，最近接咗個廣告，我會努力賺錢湊大兩個女。」

■有傳Ruby（中）不甘被Roy撇，周圍叫人唔好搵阿Yu做嘢。資料圖片