現年30歲前歌手周永恒(Roy)同有「翻版Sammi」之稱嘅妻子趙頌茹(阿Yu)噚晚驚傳家暴，據報事發於上周日（24日），Roy與妻子前往天水圍天盛苑探望父母，雙方於大堂發生爭執，阿Yu被推跌地上，面部受傷流血，事後報警求助。警方拘捕周永恒並落案起訴，下月五日在屯門裁判法院提堂。

據知今次爆出家暴事件，同婚外情有關。消息指，事發時阿Yu向Roy追問男方婚外情一事，結果兩人於走廊爭吵，期間發生推撞，阿Yu被推跌受傷流血。經過再三考慮下，才決定於29日報案。

周永恒噚晚接受本報電話訪問期間，直認太太報警一事。佢話:「今日(噚晚)去咗差館。事發係24號，喺我媽屋企，我哋因為感情問題嗌交，佢衝出lift口，我推咗佢一下，之後我返入屋，聽到佢大嗌，我出返去，見佢下巴損晒，於是陪佢去醫院，跟住就返屋企。佢沖完涼就走咗，到依家冇返嚟。」

周永恒直認有婚外情

周永恒同趙頌茹於2010年1月結婚，同年4月擺酒，當時周永恒更自爆生腦瘤，兩人自嘲經歷就如粵語長片一樣。但四年來兩人執手共度順逆，並誕下兩名女兒，建立幸福家庭，豈料突然傳出男方有婚外情，更爆出家暴事件，趙頌茹更報警求助。

周永恒昨晚接受電話訪問，記者問他:「係咪有第二個女人？」周永恒直認:「係，係朋友講俾阿Yu聽。」

訪問中周永恒哭了起來，反覆謂:「我好愛太太!」事發至今五日，趙頌茹仍未回家，亦未有同周永恒聯絡，周永恒話:「我到依家搵唔到佢，冇直接聯絡。我知佢同高皓正、何基佑有少少聯絡，我都係透過佢哋搵太太。」

趙頌茹大義滅親報警

周永恒承認有同太太推撞及嗌交，佢話:「啱啱喺差館簽擔保。我知自己做錯，太太報警告我，我好唔開心。到依家搵唔到佢。」

周永恒續道:「我錄口供打指模嗰陣，收到朋友whatsapp話好擔心我。我唔係天使，我係罪人。我知弟兄姊妹幫我祈禱，想我悔改。」

「我呢幾日喊到唔識喊，冇眼淚。好想搵番太太，好想有完整屋企。我好失落。呢段時間好想同爸爸媽媽兩個女靜落嚟，諗下以後方向。好想挽留同太太關係。」

周永恒稱深悔傷盡太太趙頌茹的心，且令其受傷。周永恒哭道:「我的確做錯，郁手推佢，令佢下巴損咗。好想佢原諒，同埋神原諒我。希望弟兄姊妹俾空間我。」

周永恒兩公婆都是教徒。神創造天地需要七日，搞婚外情仲出手推老婆落地的周永恒，反省只需兩日，因為兩個女令佢反思己過。

「我唔見咗老婆五日，第一日覺得好煩，算；第二日開始悔改，因為兩個女好重要。」

周永恒亦提到自己都面對不小生活壓力:「我雖然係公眾人物，但係我冇戲拍、冇碟出，但要面對好多人，我都有壓力。呢年發生好多事，希望大家俾空間我。」

周永恒又表示，事發後這五日，令他感受良多，特別係女兒，令為人父的他感慚愧:「有日同大女去街，佢話媽咪好辛苦，問我點解打媽咪，搞到媽咪下巴損咗。叫我同媽咪講對不起，我當下即刻攬住個女喊。」

「我好愛佢(趙頌茹)，仍然唔想放棄。我知錯。我勇於承擔責任，同個女講自己做錯咗。自己雖然身為爸爸，仍要學習點生活同做人。」