日前才被影到在家俬店連咀13啖嘅何傲兒同富家子周子揚，拍拖14日，今日卻有消息指何傲兒單方面突然宣佈分手。何傲兒話覺得自己喺感情方面未ready，故決定分手。但奇在原來佢同記者講分手時，周子揚係全不知情，仲傻更更咁匆匆收線話要了解下。

今日周子揚喺將軍澳接受記者訪問，問到係咪分手？佢語氣平靜承認：「係呀，我哋已經分咗手。」記者謂你哋啱啱先開始拍拖？佢話：「係呀。」何傲兒提出分手？周子揚話：「冇乜所謂，總之大家都有呢個睇法。」出現乜嘢問題？佢話：「冇乜特別原因，我地傾過感情事唔回應，多謝大家關心。」

仲係朋友？周子揚話：「當然係。」影到啜嘴相女方嗌分手？佢否認：「唔關事，總之原因唔想講。」再見尷尬？佢話：「唔會。」問係咪搞地下情？周子揚即刻窒一窒：「我唔想再講感情事。」

致電何傲兒了解分手原因，她說：「自己對呢段感情未ready，過去一段日子自己作為藝人，喺公開場合言行舉止應該要有分寸，唔適當場合要say no，但自己冇足夠經驗去處理，我覺得要人保護自己，不如自己保護自己。」是否覺得周子揚太猴擒？她說：「問題永遠係自己。」兩人忽爆分訊是否受到公司壓力？何傲兒否認：「絕對冇。」家人是否給予壓力？她坦言：「作為父母睇到當然心痛，公眾人物責無旁貸。」對於有懷疑他們搞地下情，何傲兒就否認此事，問到二人再見亦是朋友？她將周子揚降呢說：「當然係同事，見面冇需要尷尬。」

傍晚5時許何傲兒現身將軍澳拍外景，戲外的她心情好輕鬆，完全沒有剛分手的傷痛，笑容滿面零眼淚，何傲兒說：「今日係工作，心情都OK，自己公私分明，唔開心唔應該表露出嚟，屋企人都知道，佢哋睇到報道好嬲，自己都覺得唔啱，做得非常之差。」

問跟周子揚有否機會復合？她說：「將來唔敢講，現階段真係冇諗過呢個問題。」既然回復單身，會否投向「契爺」林建名懷抱？她失笑說：「呢個故事作到咁上下去到尾聲，自己作為觀眾都覺得爺孫戀故事有點兒悶。」她承認跟林建名有聯絡，問對方有否安慰她失戀？何傲兒說：「暫時冇機會去聯絡，其實一直有keep住溝通。」晚上約8時，何傲兒在微博留言說：「未有好好的準備去接受一份感情，現今的步伐，確實未能追得上，雖然發生了，也是要終止，希望第二度彩虹，在適當時候會再度出現吧！」