朱咪咪下周在紅館開騷，日前她變身豹妹大騷光管腳。

肥師奶未必只留在家中煮飯洗衫，朱咪咪便叻過不少偶像派，想當年酒廊歌手出身的她，早於 20年前便登紅館開騷，下周二她重踏這個大舞台。朱咪咪日前變身狂野豹妹，她笑說：「我有信心自己裝扮後，大家都仲嗒得杯落 o架！」

實力搞笑兼備的朱咪咪 90年已踏過紅館台板，至今事隔 20年，她將在下周二舉行一場「朱咪咪唱爆再玩轉紅館演唱會 2010」。朱咪咪日前接受本報記者專訪，豪氣地說：「之前祥仔（黎耀祥）成日講，人生有幾多個 10年，但以後要改口，人生有幾多個 20年，我做埋呢次， 20年後想再做可能要人扶我上台。」
現年 55歲的朱咪咪保養得宜，相信 20年後再踏紅館也冇難度，她說：「過往唱細場，對我嚟講濕碎，攞個軀殼就上台，但紅館場大，一定要有製作，呢次一場騷製作費就過百萬。」她還邀請了笑彈王祖藍和阮兆祥做嘉賓助陣。

奶媽形象深入民心，朱咪咪笑言決不減肥。

柴九金句「人生有幾多個 10年」， 55歲的朱咪咪怕 20年後要人扶上台演出。資料圖片

減肥怕降 Cup

朱咪咪揚言會大玩百變形象，訪問當天她便為記者預演，她一洗樸素，狂野辣妹上身。朱咪咪換上豹紋短裙，一對光管腳罕有曝光，問她可會為演唱會進行地獄式減肥？她說：「大家都記得我朱咪咪係咁嘅形象，萬一我減咗肥，咪唔見咗個『咪咪』。我有信心自己裝扮後，大家都仲嗒得杯落 o架！」
演唱會要以歌會友，朱咪咪除大唱懷舊金曲，還會演繹容祖兒、楊千嬅、鄭秀文和陳慧琳的歌，朱咪咪說：「我家已開始聽佢哋啲歌洗腦。」
採訪：比華利　攝影：林德雄
場地提供： Santa Lucia Restaurant& Sky Bar