今年觀眾投票成功選出港姐冠軍陳凱琳，不過舊年贏盡民意嘅朱千雪就冇咁好彩，因為電腦down晒機，結果要用番評判畀分，即係交由評判選擇，選咗張名雅做冠軍，朱千雪只係得到季軍咋。不過正所謂「塞翁失馬、焉知非福」，朱千雪不但之前做咗無綫嘅《勁歌金曲》主持，仲做埋台慶劇《On Call36小時2》嘅女主角，同吳啟華飾演一對。咁仲未夠喎，近日朱千雪躍升到大銀幕，演出新戲《大峽谷》（暫名）扮女警，同張家輝及張學友演對手戲。

■朱千雪處女拍電影扮演警察，單係外形似模似樣。

兩韓型男齋等

日前朱千雪喺佐敦德興街度為新戲拍外景，見佢一身套裝心口掛住個證件，據知喺戲中佢係扮演女督察，手上攞住個文件夾嘅佢，前後左右都有扮演軍裝警嘅臨時演員，齋睇個樣真係似模似樣。當晚就唔見同朱千雪最多對手戲嘅張家輝，反而就見到有份演出嘅韓國偶像崔始源同池珍熙喺度，佢哋一早化好晒妝坐喺度等埋位，佢哋同聲同氣，都有邊行邊吹水。

■崔始源同池珍熙鏡頭外都有傾幾句。

■當池珍熙行過時，fans即把握機會影相。

■因被fans追着，崔始源要回酒店暫避。

跳入影圈嘅朱千雪，全程表現淡定，落場拍咗3至4個鏡頭，都好順利。反而崔始源同池珍熙就遲遲未埋位拍，仲吸引越嚟越多fans，最後工作人員叫佢哋返上酒店避一避fans嘅貼身狙擊。