「拿督千金」莊思敏於2010年上演一幕升「胸」奇遇，雙峰由A Cup跳升至C Cup，事業同樣創出高峰。四年後的今日，她驀然回首，依然無悔當年決定，並揚言一世不拆彈，繼續挺起胸膛做人：「一個人做唔做整容手術，就好似你食唔食豬牛羊一樣，都係個人嘅選擇。」其實不止A、B餐，你還可以有更多選擇！
其實萌生隆胸想法前，Jacquelin曾試食豐胸藥及利用儀器來豐胸，但都以失敗告終。她指曾服用豐胸藥一段短時間，但發現當中含雌激素成分會刺激賀爾蒙，由於母親與姨媽也曾患乳癌，故她患乳癌的機會比一般人高，所以不能服食雌激素成分的藥物，以免增加患癌風險。Jacquelin亦試過連續三個月利用儀器及人手豐胸，雖然每做完一次療程，上圍也會跳升一Cup，但可惜只能維持三日，並非長久之計，最後她認為只有隆胸才可一勞永逸。
敢作、敢為、敢言，名模莊思敏（Jacquelin）向來是現代女性的典範，2010年把勇敢作風完全表露，接受交叉線雙眼皮手術及矽袋隆胸手術，將A Cup上圍隆至C Cup，並把手術過程全公開，向所有人坦承整容，坦蕩得叫人佩服。一片稱讚的聲音外，有網友表示不能置信，甚至有人覺得Jacquelin瘋了。這也難怪，因在不少人眼中身為馬來西亞拿督千金的她，樣貌不差兼擁有令人稱羨的1米77身高，根本毋須後天改良。不過，Jacquelin解釋隆胸並非來自對身材的不滿，而是出於工作需要：「試過行騷要着啲需要谷胸嘅衫，我要戴兩個Nude Bra、六個墊，又要黐膠紙，最慘係我對Nude Bra敏感！我唔會對自己嘅身材覺得自卑或者冇自信，我嘅冇自信只係來自驚穿崩，唔知幾時會跌個墊出嚟！隆胸只係將外置嘅Nude Bra變成內置啫！」
Profile
莊思敏 （Jacquelin）
年齡：34歲
三圍：34C、24、36
身高：1米77
屢遇小三 情路上-包容到盡
隆胸後，Jacquelin獲得不少正面鼓勵及評價，但當然亦有難聽說話，有時候甚至會利用隆胸來攻擊她，例如指她「打假波」與「人造人」等，她不忿地說：「我唔會唔開心，只係好忟啲人智商係咁嘅程度！我隆胸關你咩事？唔明點解啲人接受到一個人黐雙眼皮膠紙，而接受唔到一個人割雙眼皮，其實出嚟個效果係一樣！」她認為隆胸或整容純屬個人選擇，又不會傷害到其他人：「一個人做唔做整容手術，就好似你食唔食豬牛羊一樣，都係個人嘅選擇。」
雖然要承受外界的評頭品足，但無可否認的是一「隆」成名，Jacquelin坦承當時工作量有所增加，但並非因升Cup所致，而是出於大家對隆胸的好奇及話題性，畢竟公開承認隆胸的藝人少之又少。至於隆胸有否招惹狂蜂浪蝶或反過來令追求者卻步？她笑言身材與追求者數量並非掛鈎：「又冇多咗人追喎！亦冇男生好抗拒，我覺得依家男性接受另一半整容同隆胸嘅程度高咗，我認識嘅男性朋友都認為整得靚同自然就冇問題，但最好你講畀佢知，尤其隆胸，摸嘅時候都會知，始終同真嘅係有啲唔同，你會摸到裏面係有啲硬嘢，而且除咗個胸圍，個胸都唔會墮，一除Bra就分到啦！」
「就算隆胸都可以餵人奶」
對於有傳舊愛吳浩康（Deep）因接受不到隆胸而分手，Jacquelin直言並非事實，指隆胸前曾問對方意見，Deep當時也表贊同。那麼是否因隆胸而要兩人禁慾半年所致？她即哈哈大笑：「隆胸對性生活嘅影響一定小過割包皮。只係隆完胸頭幾個月係康復期，要好小心護理，可以摸但唔可以大力揸，性生活一樣可以有。」
隆胸至今四年，Jacquelin對當初的決定從沒後悔，更揚言一世不拆彈：「我冇諗過拆彈！好滿意依家嘅身材，唔使再用墊。個矽袋理論上可以用一世，當然最好每年去醫生度檢查吓！」連將來生兒育女要餵人奶這個問題，她也考慮過：「我問過醫生，佢話就算隆胸都可以餵人奶！」假設將來結婚，丈夫要求拆彈，怎辦？她即說：「我會研究吓，大家要時間討論，我會同佢講，『拆彈』唔係去番之前咁樣，而係衰過之前，因為啲皮鬆弛咗，所以如果唔係身體有問題而必須要拆彈，我都唔會拆﹗」
不過，她強調並不鼓吹隆胸，要視乎個人需要而定，當中所承受的壓力及面對的聲音更不少，若為討好男友而隆胸就更沒有必要。
「蠢到出埋錢畀佢哋築愛巢」
隆胸議題上會前思後索，但面對愛情卻非常盲目，Jacquelin自言是「高速衝埋牆」的類型，為愛情可以去得很盡：「每次拍拖都會好盡力去遷就對方，務求令到段關係可以長久，因為我想自己無悔，就算最後要分手，都會覺得盡咗力，分都分得心安理得。」她坦言不介意為愛情付出，只要能力做到的，無論金錢、人脈方面也會盡力協助另一半，但無奈善意卻被利用：「我當時喺中環做緊酒吧生意，其中一個女職員住喺屯門，所以我叫佢不如搬去公司附近住，當時我嘅另一半不停游說我出錢畀個女職員喺中環租屋，最後先發現原來佢哋搭上咗，我仲蠢到出埋錢畀佢哋築愛巢！不過我冇嬲個女仔，因為一開始係我嘅另一半說服我畀錢佢租屋，而且我覺得係另一半做主動先囉！」Jacquelin不諱言對伴侶的接受度及容忍度高，唯獨不能接受不忠，可惜以往的愛情關係中，分手原因往往是第三者的出現：「無論對方有咩壞習慣或者脾氣幾差我都可以忍，但有第三者就唔忍得！男人會用『愛同性係分開』做藉口，你已經同太太或者女友有性生活，點解仲要出去滾？我唔會接受呢個解釋。」她認為一個變心的人總有萬個理由及藉口，她記得曾經問另一半為何喜歡自己，對方答喜歡她的獨立，但最後因第三者分手，原因竟然是她太獨立，不如新歡般小鳥依人，氣得Jacquelin無言。
「啲男人唔付出係唔會珍惜」
現時單身的Jacquelin直認想結婚，可惜苦無對象，她知道自己外表給人「惡女」之感，但否認是眼角高的港女一名：「我唔會逼佢去我鍾意嘅餐廳食飯、唔會要佢幫我挽手袋、唔會逼佢送手袋畀我、唔會五時花六時變……我會尊重佢有自己嘅朋友圈子同工作，但唔可以一個禮拜只係見一、兩次面，我覺得一段關係要花時間去經營。」她又慨嘆現今男士大多沒有追求異性的耐性，邀約一、兩次但見女方沒反應便轉移目標，又或者採取漁翁撒網式「釣」對象。問到會否主動追求心儀對象？原來Jacquelin的敢做作風並不適用於情場上，她想了想才說：「唔會！除非我好了解對方啦！否則佢唔鍾意我，但佢本住『食咗先算』嘅心態，咁我咪賴嘢！啲男人唔付出係唔會珍惜！我個人對性觀念唔開放，唔會玩一夜情，覺得性係要建立喺有愛嘅基礎上，要識得保護自己。」
富家女抓撈 以為玩玩吓
對愛情從不採取主動的Jacquelin，對事業卻剛好相反，勇於爭取演出機會，身為無綫合約藝人的她一直擔任主持工作，但其實一直恨拍劇，曾透過不同渠道及續約時表明心迹！有次探拍攝《愛．回家》的妹妹莊思明班時，她見到該劇監製即毛遂自薦，希望有機會在該劇演出，但最終沒有聲氣。
「我個樣唔入屋」
Jacquelin思前想後，歸咎於形象太鮮明：「我有同江美儀講想拍劇，佢話我個樣唔入屋，而且我做《姊妹淘》主持經常『咇呢叭啦』，太深入民心，要撞啱有呢類型角色先會諗起我。」
除了限於形象外，Jacquelin指「拿督女」之名亦影響工作機會：「啲人覺得我屋企有錢，會有小姐脾氣、賺錢買花戴，唔會認真工作，只係玩玩吓！時間可以證明一切，同我合作過嘅人都知我工作係好認真。」她稱當初隆胸也是出於工作需要，若將來拆彈，也只會因為工作關係：「如果有部戲要搵我反串做韋小寶，需要平胸，我會願意為部戲而拆彈。」為電影增肥、剃頭甚至露點的人不少，但相信為此拆彈的人，Jacquelin將會是影壇第一人！
後記：呢啲咪叫專業！
莊思敏向來是爽快之人又是專業名模，拍攝當日就算只穿內衣在戶外進行拍攝也絕無扭擰（現場不時有其他車輛駛過，不遠處更有人玩遙控直升機！）每當攝影師有任何要求，她也一一照做，甚至叫她躺在微微發熱的車頭冚上，Jacquelin亦二話不說便躺上去，還落力擺出不同甫士，多得她的專業，令拍攝過程十分順利，超速完成。
拿督女愛打拚
今年34歲的莊思敏出身大富之家，建築師父親莊寶是馬來西亞華僑富商，身家逾8億港元，2008年獲封拿督兼曾為中國光大控股前主席，家族生意涉獵甚廣，包括珠寶、房地產及紙業等，早年斥資逾億港元在山頂道買下4,000呎獨立屋，讓留港發展的莊思敏及弟妹居住，期間因裝修關係，安排子女入住貝沙灣，月租逾7萬元。愛車如命、曾先後擁有至少五部車的莊思敏，一度想到日本發展，有指其母為阻止她，送上價值20多萬元的房車作「利誘」，而父親亦曾送價值41萬元的平治C 200讓她代步。
雖然衣食無憂，但莊思敏卻愛靠自己打拚，早年在珠海書院讀商科時已開始擔任模特兒，近年更展開多元化發展，包括做主持、演員及DJ，曾拍攝逾15部電影包括《潮性辦公室》及《猛龍特囧》等，隆胸後更獲導演王晶賞識做「晶女郎」。莊思敏與娛樂圈甚有淵源，母親江玉珠為前亞視藝人，舅父江道海則為著名武術指導，並對魔術甚有研究，早年梁朝偉拍電影《大魔術師》亦是向他取經。