電視圈上位定理，選港姐一定比投身訓練班更快。哪管是腰纏萬貫的林峯，訓練班出身，一樣要經歷跑龍套的日子。若然是港姐出身，落選似黃智雯，肯搏肯捱，願意不顧儀態，在螢光幕前潑婦罵街，六年可以嶄露頭角，問鼎最佳女配角。至於港姐冠軍級人馬朱晨麗，未卸任已經入劇組，有名有姓有對白，劇集一部接一部，前途無可限量。

無綫劇集《情逆三世緣》後日大結局，劇中黃智雯與朱晨麗於其中一世有緣相遇卻不相知，二人鬥靚、鬥性感、鬥舞技、鬥爭仔。因拍劇結緣，之後卻無緣再聚，日前二人接受訪問時，朱晨麗即指着黃智雯破口大罵：「你個角色（田秋雁）好衰、好乞人憎呀！文鬥舞鬥，感情又鬥，放火燒屋，搶人男友，偷錢又對家姐唔好，睇番你做每一個表情都係奸，你做得好投入，帶到我入個角色。」

■朱晨麗（左）與黃智雯日前接受訪問，鏡頭前後都頗有默契。攝影：陳慧安

■黃智雯（左）及朱晨麗有說有笑，狀甚老友。

一定有陰暗面

累積六年演戲經驗，黃智雯對人物角色的分析更立體，她說：「呢個係一個悲劇人物，好多網民留言我都有睇，鬧得好緊要！我覺得佢好慘，佢一生只係想報仇，就算結咗婚有個仔，到生命結束時都係想報仇，一生人承受好大壓力！」黃智雯花了不少工夫處理角色，還跟師妹朱晨麗分享經驗：「睇劇本要不斷游說自己點做，要諗負面同好dark side嘅嘢。我做咗好多亦正亦邪嘅角色，好多人問我點解成日做奸，首先演員係被動，可能好多觀眾會鬧，咁即係有人睇，仲要睇得投入。」

在悲劇人物田秋雁身上，學懂了善和惡，但人又怎可能是非黑即白，初出茅廬的朱晨麗理直氣壯說：「現實中嘅朱晨麗一定唔會好似角色（林艷芳）咁，只係會畀心機跳多啲舞，勤力啲賺多啲錢，唔會話利用得就利用！」相反經過年月洗禮的黃智雯，卻有不同的人生觀：「有時角色唔係分好同壞，人係好立體，一個人唔會永遠係大好人，一定有陰暗面，人係應該要咁。人係有變化，所以角色都應該有變化，我唔信你冇諗過衰嘢囉！」

■朱晨麗擔心冇人追，考慮應否採主動。

豁出任人擺佈

智雯突然又說回演戲，她說：「有時好多拘束，會唔會破壞形象？我喺關二嫂嗰時先開始放低咗！」聽得入神的朱晨麗，似如獲至寶，急急追問黃智雯：「咁點樣跳出個框？」智雯說：「由第一套劇，選完港姐之後，當自己白紙一張，任人擺佈，做鵪鶉妹、泥水妹呀關二嫂，要好放得開，唔好諗自己個樣美唔美觀，咁當然有啲位梗係要靚啦！收放自如，我一路都學緊！」

愛情觀大不同

■黃智雯演技不俗，是無綫新一代實力派小花。

莫說是三世緣，黃智雯與朱晨麗連今世都不敢多說，置身電視廣播城，過着工廠式的穿膠花生活，愛神丘比特又怎會穿牆過壁找上門來？朱晨麗都開始擔心：「我哋咁被動，人哋唔會主動嚟追我哋，點算呀？咁多女仔主動，我係咪應該進取，定係做番自己呢？我仲諗緊！」至於黃智雯則堅持己見：「我信緣分，有緣分就點都擋唔住，所以我唔會刻意好進取。」黃智雯有個圈外有米男友，曾被拍到在山頂燭光晚餐：「咁keep住有食飯，絕對要調劑吓生活，維繫感情就要睇雙方，大家都好想關係keep住，係一定會搵到時間，或者一定會用個心做啲嘢出嚟。」

服裝：N12H（黃智雯）、LAMPS（朱晨麗）
化妝：亨利（朱晨麗）