女人最怕被人呃，尤其是靚女，港姐冠軍朱晨麗點會唔知？多得母親自細訓練，從小送她到上海寄宿，學會過獨立生活。不過，年少無知的朱晨麗亦因此事而誤以為母親不理她，當發現真相後才深明母親的用心良苦。

撰文：何慧斯

出身於蘇州的朱晨麗，自小被視為掌上明珠，經常與鄰居、街坊和表哥表妹一齊玩，細細個已經有超強表演慾的朱晨麗笑說：「嗰陣真係年少無知，又鍾意唱歌，爺爺同嫲嫲成日都叫我唱歌，我又唔知醜，唱到歪晒音都繼續唱，所以希望大個咗做歌手，覺得做歌手好有型。」當她10歲時，被父母送往上海寄宿，學習過獨立的生活，朱晨麗說：「嗰陣阿媽話我，女仔唔識獨立嘅話，好容易俾人呃，所以要我識得點樣保護自己，身體一定要健康，不過阿媽好少打嚟問我做緊乜嘢，就算咁近都好少嚟探我。」

【7個月】
■朱晨麗生於蘇州，是父母眼中的掌上明珠，集萬千寵愛在一身。

【9個月】
■朱晨麗細細個似足男仔頭，相當好動。

【5歲】
■朱晨麗參加學校活動，化妝後即變小美人。

【6歲】
■自細喜歡唱歌的朱晨麗，唱到走音都繼續唱，這張拿結他相，應該是「扮嘢」居多。

15歲那年，朱晨麗又被送到香港讀書，兩年後再赴美國繼續升學，但媽媽對她的態度一直沒變，直到有年暑假朱晨麗回家探親，終於按捺不住走去問媽媽，結果發生一件令她畢生難忘的事，她說：「我對住阿媽話係咪好唔鍾意我？好想掟低我？阿媽聽完之後一句嘢都冇講就走咗，冇幾耐佢先話畀我聽，屋企唔係話似人哋大富大貴，為咗供養你要賺錢，佢唔係唔理我，相反係時時刻刻都好關心我。」

訓練獨立

朱晨麗終於明白媽媽苦心，她說：「原來佢怕俾我知道嘅話，會依賴佢，變得唔獨立。嗰一刻我先明白，我真係錯，點解我可以咁唔成熟，估唔到阿媽咁努力為我鋪路。嗰次之後我從來都唔問阿媽點解，我知佢樣樣嘢都係為我。」

【17歲】
■朱晨麗17歲已亭亭玉立，當然也學會自立。

【23歲】
■前年參加港姐選舉，結果一舉奪得冠軍。